اقش وكىلدەر پالاتاسى مەن سەناتتىڭ 70-تەن استام مۇشەسى ۇكىمەتكە قىتاي بيلىگىنىڭ شىڭجاڭدا جاساعان گەنوتسيدى مەن ادامزاتقا قارسى قىلمىستارىن انىقتاۋ تۋرالى تاپسىرما بەردى. سوعان قوسا، وسىنداي «ورەسكەل ساياساتتى» جۇزەگە اسىراتىن قىتاي شەندىلەرىنە سانكتسيا سالۋعاشاقىردى.

كەشە، رەسپۋبليكاشىلدار مەن دەموكراتتاردان جيىنى 74 سەناتور اقش مەملەكەت حاتشىسى م. پومپەو مەن قارجى ءمينيسترى س. منۋچينگە حات جولدادى. حاتتا ولار قىتاي ۇكىمەتىنىڭ شىڭجاڭداعى ۇيعىرلارعا جانە باسقا دا مۇسىلمان از ۇلتتارعا قارسى ارەكەتتەرىن جالعاستىرىپ جاتقانىن، كوممۋنيستىك بيلىك ونداعى از ساندى ۇلتتاردىڭ مادەنيەتى مەن ءدىني سەنىمدەرىنە ەركىندىك بەرمەيدى جانە ايەلدەرگە قارسى زورلىق-زومبىلىقتى قولدايدى دەپ مالىمدەگەن. بۇل ارەكەتكە اقش پەن حالىقارالىق قاۋىمداستىقتىڭ جول بەرمەۋى قاجەت دەلىنگەن.

«سىزدەردى وسى قاتال ساياساتتى ايىپتاۋعا جانە وسى قىلمىستاردى جاساعان قىتاي شەنەۋنىكتەرىن سانكتسيالاۋعا شاقىرامىز، سونىمەن بىرگە ۇكىمەتتەن قىتاي ۇكىمەتىنىڭ ۇيعىر، قازاق جانە باسقا دا مۇسىلمان از ۇلتتارعا جاسالعان قاتىگەز قىلمىستار مەن گەنوتسيد ارەكەتتەرىنە قاتىستى مالىمەت بەرۋدى سۇرايمى»، – دەگەن سەناتورلار حاتتا.

زاڭ شىعارۋشىلار اقش ۇكىمەتىن باسقا مەملەكەتتەرمەن بىرلەسە وترىپ قىتايدىڭ شىڭجاڭداعى ساياساتىن باقىلاۋ جونىندەگى بۇۇ باستاماسىن قولداۋعا شاقىردى. ولار سونداي-اق: «ءبىزدىڭ وكىلدەر بۇۇ قاۋىپسىزدىك كەڭەسىنىڭ بريفينگتىك وتىرىسىن وتكىزىپ، شىڭجاڭداعى جاعداي تۋرالى ارنايى بايانداماشى تاعايىنداۋى كەرەك»، - دەگەن.

"قىتايدىڭ گەنوتسيد ساياساتىن ايىپتاپ، شىڭجاڭداعى ازشىلىق توپتاردىڭ ءماجبۇرلى ستەريليزاتسيا، تۇسىك جاساتۋ جانە قاماۋدا ۇستاۋ، قيناۋ ارەكەتتەرىنىڭ الدىن الىپ، قىتاي ۇكىمەتىن دەرەۋ اقش پەن حالىقارالىق قاۋىمداستىق تاراپىنان قاتاڭ ايىپتالۋى كەرەك", - دەيدى كونگرەسمەن سميت. ول جانە حالىقارالىق وليمپيادا كوميتەتىن 2022 جىلى پەكيننىڭ قىسقى وليمپيادا ويىندارىن وتكىزۋ قۇقىعىنان ايىرۋعا شاقىردى. ول جانە: «گەنوتسيد نەمەسە ادامزاتقا قارسى قىلمىس جاساعان ەشبىر مەملەكەتكە سىيلىق بەرلمەۋى كەرەك»، – دەدى.

"The Qazaq Times''