قازاقستاندا كوروناۆيرۋس جۇقتىرعاندار سانى 18020 ادامعا جەتتى. وتكەن تاۋلىكتە 366 ادامنان ۆيرۋس انىقتالىپ، ءوسىم 2,6% بولعان. مالىمەتتەر بويىنشا، 3782 ناۋقاستا اۋرۋ سيمپتومسىز.

كوروناۆيرۋس جۇقتىرعاندار سانىنىڭ ارتۋىنا بايلانىستى جامبىل، قاراعاندى جانە اقتوبە وبلىسىندا كارانتين شارالارى كۇشەيتىلدى. بۇگىننەن باستاپ جامبىل وبلىسىندا ءجۇرىپ-تۇرۋ تۇنگى وننان تاڭعى التىعا دەيىن شەكتەلەدى. بازارلار مەن ازىق-تۇلىك ەمەس دۇكەندەر تاڭعى ساعات 8-دەن تورتكە دەيىن، ال حالىققا قىزمەت كورسەتۋ ورتالىعى تاڭعى 9-دان 5-كە دەيىن اشىق بولادى. 2 مىڭ شارشى مەتردەن اساتىن ساۋدا ورتالىقتارى، تۇنگى كلۋبتار، قوعامدىق مونشالار، ساۋدا جانە ويىن-ساۋىق ورتالىقتارىنداعى بالالار الاڭدارى، ءدىني ۇيىمدار، 50 ورىننان اساتىن تاماقتانۋ ورىندارى مەن اۆتوموبيل جانە مال بازارلارىنىڭ قىزمەتىنە دە تىيىم سالىندى.

جەزقازعان ماڭىندا قارقارالى اۋدانىندا جانە شەت اۋدانىنىڭ جارىق اۋىلىندا توسقاۋىل بەكەتتەر قويىلدى. مەملەكەتتىك قىزمەتكەرلەر، بيۋدجەتتىك مەكەمەلەردىڭ ماماندارى نەگىزىنەن قاشىقتان جۇمىس ىستەۋگە كوشىرىلدى. ساۋدا جانە قوعامدىق قىزمەت كورسەتۋ ورىندارىنىڭ جۇمىس كەستەسىنە وزگەرىس ەندى. قاراعاندى وڭىرىندە قازىرگى كەزدە 1 مىڭ 342 تۇرعىننان قاۋىپتى ۆيرۋس انىقتالعان.

"The Qazaq Times"