ساراپشى: ءولىمنىڭ كوبەيمەۋى – بيلىكتىڭ ارقاسىندا ەمەس، حالىق جاسىنا بايلانىستى قالىپتى قۇبىلىس

كەشە، 3 ماۋسىم كۇنى قاراعاندى وبلىسىنىڭ 56 جاستاعى، اتىراۋ ءوڭىرىنىڭ 56 جانە 69 جاستاعى تۇرعىندارى، سونىمەن قوسا 69 جاستاعى قايتىس بولعانى حابارلاندى. جازدىڭ العاشقى 3 كۇنىندە دەرتتىڭ تۋرا اسەرىنەن 8 قازاقستاندىق ۆيرۋستىڭ كەسىرىنەن قازا بولدى.

سوڭعى جىلدارى سانيتارلىق-ەپيدەميولوگيالىق سالا قۇردىمعا كەتىپ بارادى دەپ سانايتىن مەديتسينا ساراپشىسى قايىرعالي كونەەۆ جوعارى ينستانتسياداعى جاعدايعا ءوز پىكىرىن ءبىلىردى.

«سانيتار دارىگەرلەردىڭ ءوزى نە ىستەرىن بىلمەيدى. مۇنى باس مەملەكەتتىك سانيتار شىعارعان قاۋلىنىڭ ەكى جارىم ايدا 7 مارتە وزگەرۋىنەن كورۋگە بولادى. ءتىپتى ءبىر قاۋلى ەكىنشىسىنە قايشى كەلەدى. ماسەلەن،7 قاۋلى بەسىنشىسىن تەرىستەيدى. بۇل قازاقستاننىڭ سانەپيدەميولوگياسى «پانيكادا» ەكەنىن اڭعارتادى. ەڭ باستى ماسەلەنىڭ ءبىرى – اتالعان سالادا ءوز ءىسىن جەتىك بىلەتىن ماماننىڭ بولماۋى. كاسىبي كادرلاردىڭ كوبى كەزىندە ەڭبەك جاعدايىنىڭ ناشارلىعىنان تاۋەلسىز سانيتارلىق اۋديت، جەكە بيزنەس سالاسىنا كەتىپ قالعان. كوز الدىمىزدا بولىپ جاتقان كەمشىلىكتەر مەن شيكىلىكتەردىڭ ءبارى مەملەكەتتىك باسقارۋداعى سەس سالاسىن دەنساۋلىق ساقتاۋ مينيسترلىگىنەن ءبولۋ كەرەكتىگىن كورسەتەدى»، – دەيدى.

ماماننىڭ سوزىنە قاراعاندا، قازاقستاندا تىركەلگەن كەيستەرگە شاققاندا ءولىم كورسەتكىشى الدەقايدا تومەن. ءتىپتى تۋرا پروپورتسيودان ايتارلىقتاي از. مەديتسينا عىلىمدارىنىڭ كانديداتى كونەەۆ «ءبىزدىڭ جاعدايداعى ءولىم كورسەتكىشىنىڭ ازدىعى – بيلىكتىڭ ارقاسىندا ەمەس، حالىقتىڭ جاسىنا بايلانىستى تابيعي جاعداي. قازاقستان حالقىنىڭ ورتاشا جاسىنا قاتىستى. ەرلەردىڭ ورتا جاسى – 30, ايەلدەردىكى 33 جاس. دەمەك نەگىزگى كونتينگەنت  جاس بولعاندىقتان، ۆيرۋسقا قارسى ەلدىڭ يمۋندىق جۇيەسى دە قاۋقارلى», – دەپ ناقتىلادى.

سونىمەن قوسا ساراپشى كوروناۆيرۋس كەيستەرىنىڭ شىنايى ەسەبىن ەشكىم، ءتىپتى مينيستر دە بىلمەۋى مۇمكىن دەيدى. ونىڭ سوزىنشە، قازىرگى تسيفر شىندىقتان الشاق بولۋى ىقتيمال. «وسى ۋاقىت ارالىعىندا مينيسترلىكتىڭ «تسيفرلىق كورسەتكىشتەردى ويناتۋىنا» كۋا بولدىق» دەيدى تاۋەلسىز  دارىگەر.

ەكى جارىم ايدىڭ ىشىندە COVID-19 جۇقتىرعاندار سانى 12 مىڭنان اسىپ كەتتى. ناقتىراق ايتقاندا، ناۋقاستار سانىنىڭ جالپى  جيىنى 12 067-گە جەتتى. ونىڭ جارتىسىنان كوبى (6240) اۋرۋىنان ايىعىپ ۇيىنە جىبەرىلگەن. وكىنىشكە قاراي، رەسمي اقپارات بويىنشا، COVID-19 ۆيرۋسىن جۇقتىرعان 48 ادامنىڭ جاعدايى قيىنداپ، قايتىس بولعان. دەگەنمەن بىرقاتار باق وكىلدەرى (ينفورمبيۋرو جانە ازاتتىق) وتكەن اپتادا قازاقستاندا ۆيرۋس جۇقتىرعان كەم دەگەندە 72 ادامنىڭ قايتىس بولعانىن انىقتاپ حابارلاعان ەدى.

"The Qazaq Times"