وتكەن اپتادا تالقىلانعان تاقىرىپتاردىڭ ءبىرى ەكس پرەزيدەنت، قاۋىپسىزدىك كەڭەسىنىڭ توراعاسى نۇرسۇلتان نازارباەۆتىڭ ءبىراز ۋاقتتان بەرى جۇرت الدىنا شىقپاعانىنا بايلانىستى قىزۋ تالقى بولدى. وسىعان وراي ەكس پرەزيدەنتتىڭ ءباسپاسوز حاتشىسى ايدوس ۇكىباي ارنايى تۇسىنىكتەمە جاسادى.

10 ناۋرىزداعى ماسكەۋ ساپارىنان سوڭ ەكس پرەزيدەنتتى كورمەگەندەرىن ايتقان جۇرت ءار ءتۇرلى بولجامدار جاساپ جاتىر. سولاردىڭ ءبىرى دەموكراتيالىق پارتيانىڭ جەتەكشىسى جانبولات ماماي «ەلدە وسىنداي قيىنشىلىقتار باستالعان شاقتا نۇرسۇلتان نازارباەۆ جوق بولىپ كەتتى. ول نەگە جوق بولىپ كەتتى؟ بۇل ەندى ۇنەمى سول نازارباەۆتىڭ وزىنە ءتان قاسيەت! ...ەلدە ىردۋ-دىردۋ باستالىپ نە بولماسا ءبىر قيىن جاعداي بولعان كەزدە نۇرسۇلتان نازاربەۆ ۇنەمى جوعالىپ كەتەدى. مىسالعا 2006 جىلى «شاڭىراق ۋاقيعاسى» ورىن الدى. سول ۋاقيعا تۇسىندا نۇرسۇلتان نازارباەۆ ەلدە بولعان جوق. ودان كەيىن تالاي ۋاقيعالار ورىن الدى. ءارتۇرلى وسىنداي ۋاقيعالار ورىن العان تۇستا نازارباەۆ ەش ۋاقىتتا حالىقتىڭ الدىنا شىقپايدى. ەش ۋاقىتتا ەلدىڭ الدىندا بولمايدى...» دەسە، الەم جەلىنىڭ ايتاماندارى «كورىنبەسە – «قايدا كەتتى؟» شىعا كەلسە –«شال كەت!». ۇندەمەسە – «ءولىپ قالدى» سويلەسە – «الجىعان قاقپاس». بۇل نە، ول كىم؟» دەپ جۇمباققا اينالدىرسا «ساپ-ساۋ، سەنبەسەڭدەر اكىمنەن سۇراڭدار! اكىمدەر ەندى كەزەكپەن شىعىپ، دەنساۋلىعى كەرەمەت، جاڭا عانا سويلەستىم دەگەن پوست شىعا باستايدى» دەپ جاتقاندار دا بار.

وسىنداي قىزىپ تۇرعان ءتۇرلى پىكىرلەرگە تۇسىنىكتەمە رەتىندە ەكس پريزدەنتتىڭ ءباسپاسوز حاتشىسى ايدوس ۇكىباي: نازاربەۆتىڭ بىرقاتار ايماق باسشىلارىمەن تەلەفون ارقىلى سويلەسىپ توتەنشە جاعداي كەزىندە حالىقتىڭ قاۋىپسىزدىگىن قامتاماسىز ەتۋدىڭ وزەكتى ماسەلەلەرىن تالقىلاعانىن، ءارى قاتاڭ كارانتين جاعدايىنا بايلانىستى نازارباەۆتىڭ جۇمىس كابينەتىنە ادام كىرۋى شەكتەلۋى كەرەك ەكەنىن ايتا كەلىپ الەم جەلىدەگى «نازاربەۆ ءتىرى مە؟» دەگەندەرگە قاراتا قاۋەسەتتەرگە تۇسىنىكتەمە بەرمەيتىنىن، «ال كىمدە-كىم كۇماندانسا، وندا كەشە ەلباسى سويلەسكەن كەز كەلگەن اكىمنەن بۇل تۋرالى سۇراۋعا بولادى", - دەدى.

سونداي-اق ءباسپاسوز حاتشىسى ەلدەگى ەنگىزىلگەن بارلىق شەكتەۋلەر الىنعاندا، ءبىرىنشى پرەزيدەنتتىڭ قاتىسۋىمەن وتەتىن جۇمىس كەزدەسۋىنەن نەمەسە كەڭەستەن بەينەجازبا جاسايتىنىن دا ايتتى.

"The Qazaq Times"