كوروناۆيرۋسقا شالدىققان ءۇشىنشى قازاقستاندىق انىقتالدى

كورنەكى سۋرەت. فوتو: اشىق دەرەككوز

ميلاننان استاناعا اۋە رەيسىمەن ۇشىپ كەلگەن قازاقستاندىق ءۇشىنشى ناۋقاس رەتىندە تىركەلگەنى راستالدى.

مينيستر ەلجان ءبىراتنوۆتىڭ مالىمدەۋىنشە، ءۇشىنشى ناۋقاسپەن بىرگە بورتتا 90 جولاۋشى بولعان. ميلاننان ورالعان ايەل قازىر استاناداعى اۋرۋحانادا. سونداي-اق ءبىر قازاقستان ازاماتى بەرليندە اتالعان دەرتپەن كۇدىككە ءىلىنىپ، كارانتينگە الىنعان. ول گەرمانياداعى قازاقستان ەلشىلىگىندە قىزمەت ەتەتىن ۇلىنا قىدىرىپ بارعان ازامات ەكەنى حابارلاندى.

«يتاليا استاناسى ميلاننان كەلگەن تاعى ءبىر ناۋقاستىڭ 12 ناۋرىز كۇنى ەلورداعا كەلگەن ايەل ەكەنى انىقتالدى. حاتتاما-نۇسقاۋ بويىنشا بايلانىستا بولعان تۇلعالار انىقتالۋدا»، - دەدى ءبىرتانوۆ.

دەنساۋلىق ساقتاۋ مينيسترلىگى شەتەلدەن كەلگەن 1786 ازاماتتى ءۇش توپ بويىنشا مونيتروينگ جۇرگىزۋدە. 1ا توبىنا 1270 ازامات، 1ب توبىنا 268 ازامات جانە 2 توپقا 248 ازامات كىرەدى. وتكەن تاۋلىكتە 361 ازامات مونيتورينگتەن بوساتىلدى.

بۇعان دەيىن تۇستە مينيستر گەرمانيادان كەلگەن 46 جاستاعى ەر ادام مەن 36 جاستاعى ايەل ازاماتتىڭ الماتىداعى جۇقپالى اۋرۋلار اۋرۋحاناسىنا قاتاڭ باقىلاۋعا الىنعالى حابارلانعان بولاتىن. بۇگىنگى ساعات 18:00-دەگى رەسمي دەرەك بويىنشا، جالپى جيىنى قازاقستاننىڭ 4 ازاماتى كوروناۆيرۋس جۇقتىرعان.