اقش اۋعانستانداعى اسكەرلەرىن شىعارا باستادى. «تاليبان» ۇيىمىمەن كەلىسىمگە قول جەتكىزگەننەن كەيىن اقش اۋعان جەرىندەگى 12 مىڭنان استام اسكەرىن 8600-گە قىسقارتۋعا مىندەتتى بولدى. امەريكا قۇراما شتاتتارى 135 كۇن ىشىندە اسكەرلەرىن شىعارىپ بولۋى كەرەك.

اقش پەن تالىپتەر اراسىندا بۇنداي بەيبىتشىلىك كەلىسىمى 29 اقپاندا جاسالعان بولاتىن. بۇنى ارينە، تولىقتاي بەيبىت قارىم-قاتىناس دەۋگە كەلمەيدى. تالىپتەر اقش اسكەرلەرى ەلدەن تولىق كەتىپ بولعاننان كەيىن عانا ۋاشينگتونمەن بايلانىستى جاقسارتۋ تۋرالى ويلاستىراتىنىن جەتكىزگەن.

اۋعانستاننىڭ ىشكى ديالوگى، ايتالىق تالىپتەرمەن كابۋلداعى رەسمي بيلىك اراسىنداعى كەلىسسوزدەر ءالى باستالعان جوق. اۋعانستان پرەزيدەنتى اشراف عاني بولسا كەلىسسوزدىڭ العى شارتى رەتىندە قاماۋداعى ءتالىپ كۇشتەرىنىڭ مۇشەلەرىن بوساتۋدان باس تارتقان. بىراق، دۇيسەنبى كۇنى انت بەرىپ قايتالاي پرەزيدەنتتىك قىزمەتىنە كىرىسكەن عاني كەمىندە مىڭعا جۋىق قولعا تۇسكەن ءتالىپ تۇتقىندارىن بوساتۋى مۇمكىن دەگەن جورامالدار بار.

اقش پەن تالىپتەر اراسىنداعى كەلىسىمنەن كەيىن ەكى تاراپ قاقتىعىسپاي قالعان جوق. وتكەن اپتادا عانا گيلمەند پروۆينتسياسىندا تالىپتەر اۋعان ۇكىمەتىنە قاراستى قارۋلى كۇشتەرگە شابۋىل جاسادى. وعان جاۋاپ رەتىندە اقش اۋەدەن سوققى باعىتتادى. بۇدان كەيىن كەلىسىم قايتا بۇزىلىپ، قاقتىعىس جالعاسا ما دەگەن قاۋىپ بولعان، بىراق، اقش پرەزيدەنتى دونالد ترامپ پەن تالىپتەردىڭ جوعارى جەتەكشىلەرىنىڭ ءبىرى تەلەفون ارقىلى سويلەسىپ كەلىسىمدە قالدى.

اقش پەن ناتو كۇشتەرى تاراتقان مالىمدەمەدە، تالىپتەر كەلىسىمدى ساقتايتىن بولسا 14 اي ىشىندە بارلىق قارۋلى كۇشىن ەلدەن شىعارىپ كەتۋگە دايىن ەكەنىن بىلدىرگەن. ول ءۇشىن تالىپتەر رەسمي بيلىككە قارسى شابۋىلدى توقتاتىپ، ەلدە «ءال-كايدا» ۇيىمى سىندى تەررورلىق توپتاردىڭ كۇش الىپ كەتۋىنە جول بەرمەۋى كەرەك. بىراق، تالاي جىلدان بەرى اۋعانستانعا كوشىپ جاتقان دايش تەررورلىق توپتارى تۋرالى بىردە ءبىر رەت ايتىلمايدى.

“The Qazaq Times”