5 ناۋرىزدا بەلسەندى ءاليا ابىلقايىروۆانى ورال قالاسىنىڭ اكىمشىلىك سوتى «ۇساق الاياقتىقپەن اينالىستى» دەگەن ايىپپەن 9 مىڭ تەڭگە كولەمىندە ايىپپۇل سالدى.

بىلتىر جەلتوقسان ايىندا وتكەن اپەللياتسيالىق سوت شەشىمىنەن كەيىن بەلسەندى ورىس قالامگەرى الەكساندر گريبوەدوۆتىڭ شىعارماسىنان ءۇزىندى وقىعان. ايىپتالۋشىنىڭ سوزىنە قاراعاندا، سوتقا قاتىسۋشىلار قول شاپالاقتاپ قولداۋ تانىتقان، دەسە دە وعان ەشقانداي شاعىم-ەسكەرتۋ بولماعان.

وتكەن جىلدىڭ 19 جەلتوقسانىندا وبلىستىق سوت ءاليا ابىلقايىروۆانىڭ اپەللياتسيالىق شاعىمىن قاراعان ەدى. بەلسەندى «پوليتسيا تالابىنا باعىنباۋ» ىسىنە بايلانىستى اكىمشىلىك سوت شەشىمىمەن كەلىسپەي ارىز تۇسىرگەن. اپەللياتسيالىق سوت شەشىمدى وزگەرىسسىز قالدىردى.

– سوت شەشىمىن ەستىپ، قاتتى كۇيزەلدىم. سوت زالىنان شىعىپ، باسىمداعى اق ورامالدى شەشىپ تاستادىم. جاقىندا انام قايتىس بولىپ، تاعىپ جۇرگەن ەدىم. «ماسقارا» دەپ ايقايلاپ، چاتسكيدىڭ مونولوگىن وقي باستادىم. ...بيلىكتى جاقتايتىن سوت جانە قۇقىق قورعاۋ ورگان جۇيەسىنە قاراتا «ماسقارا!»، «قارعىس اتسىن» دەپ ايتقانىم راس. بىراق جەكەلەگەن ادامدارعا ءتىل تيگىزگەن جوقپىن، – دەگەن ابىلقايىروۆا كەشەگى سوت وتىرىسىندا دا ولەڭ وقىدى.

ازاتتىقتىڭ حابارلاۋىنشا، ابىلقايىروۆا وزىنە تاعىلعان «ءتارتىپ بۇزدى، سوت پريستاۆتارىنا ءتىل تيگىزدى» دەگەن ايىپتارمەن كەلىسپەيتىنىن ايتىپ، پريستاۆتارمەن مۇلدەم تىلدەسپەگەنىن جەتكىزدى.

ادۆوكاتتىڭ ايتۋىنشا، قىلمىس قۇرامى جوق بولعاندىقتان جانە حاتتاما تولتىرۋ كەزىندە زاڭ بۇزىلعاندىقتان سوتتان اكىمشىلىك ءوندىرىستى توقتاتۋدى تالاپ ەتتى. رۋسلان شاعاتاەۆ قوعام بەلسەندىسىنىڭ «ۇساق الياقتىق» جاساماعانىن دالەلدەيتىن سوت پروتسەسىنىڭ بەينەجازباسىن كورۋگە بولاتىنىن ايتادى.

سۋديا قۇرماشەۆ ايىپتالۋشىنى كىنالى دەپ تاۋىپ، وعان 9300 تەڭگە كولەمىندە ايىپپۇل سالدى.

“The Qazaq Times”