بۇۇ ارمەنيا مەن ازەربايجاندى بەيبىت كەلىسىمگە شاقىرماق

ازەربايجان مەن ارمەنيا اراسىنداعى داۋلى جەر – قاراباق ماسەلەسىنە بايلانىستى ەكى تاراپتىڭ دا ورتاق بىتىمگە كەلە قويعىسى جوق. وسىنى ەسكەرگەن بۇۇ بەيبىت كەلىسسوزدەردى قايتا باستاۋ كەرەكتىگىن قۋاتتاپ وتىر. بۇل تۋرالى “فارس” باسپاسوزىندە ايتىلدى.

ازەربايجان رەسپۋبليكاسى مەن ارمەنيانىڭ داۋلى جەرلەرىنە قاتىستى اراپتار قاراباق بەيبىت كەلىسسوزدەرىنە اسا ىنتا تانىتپاي وتىرعان جاعدايداع بۇۇ بەيبىت كەلىسسوزدەردى قايتا باستاۋ قاجەتتىگىن قۋاتتادى.

بۇۇ باس حاتشىسىنىڭ رەسمي وكىلى فارحان حاق: «جۋىردا ەۋروپاداعى قاۋىپسىزدىك جانە ىنتىماقتاستىق ۇيىمىنا قاراستى مينسك توبىنىڭ ازەربايجان رەسپۋبليكاسى مەن ارمەنيا اراسىندا قايشىلىقتى بەيبىت جولمەن شەشۋ تۋرالى مالىمدەمەسى جاريالانعاندى. الايدا، ەكى جاق اسكەريلەرىنىڭ اتىستى توقتاتۋ ءبىتىمىن بۇزۋ ارەكەتى تۋىنداعان سوڭ، بۇۇ ەكى ەل باسشىسىن كەلىسسوز ۇستەلىنە قايتا كەلۋگە جانە ادام شىعىنىن بولدىرماۋعا شاقىردى»،-دەپ مالىمدەدى.

وسى ورايدا رەسەيدىڭ سىرتقى ىستەر ءمينيسترى سەرگەي لاۆروۆ تا وتكەن جۇما كۇنى (31 ناۋرىز) «ازارتادج» رەسمي اقپارات اگەنتتىگىنە بەرگەن سۇحباتىندا: «ماسكەۋ، ۋاشينگتون مەن پاريج ءازىربايجان رەسپۋبليكاسى مەن ارمەنيا اراسىنداعى قاراباق قايشىلىعىن شەشۋگە قاتىستى ورتاق كوزقاراسقا يە»،-دەپ مالىمدەدى. ول، سونىمەن قاتار، ءۇش ەل – رەسەي، اقش جانە فرانتسيانىڭ باكۋ مەن ەرەۆان اراسىنداعى قاراباق قايشىلىعىن شەشۋگە باعىتتالعان ارىپتەستىگىنىڭ جالعاساتىندىعىنا ءۇمىت ءبىلدىردى.

رەسەي سىرتقى ىستەر ءمينيسترىنىڭ ءسوزى قاراباق قايشىلىعىن دوعارۋ ءۇشىن ەۋروپاداعى قاۋىپسىزدىك پەن ىنتىماقتاستىق ۇيىمىنا قاراستى مينسك ارااعايىن توبى باسشىلارىنىڭ ۇيلەسىپ ارەكەت ەتەتىنىن كورسەتتى. الايدا قارسىلاسۋشى تاراپتار، اسىرەسە ازەربايجان رەسپۋبليكاسى مينسك توبى باسشىلارىنىڭ قولداۋىنا اسا ءۇمىت ارتپايدى. باكۋدىڭ كەيبىر مەملەكەتتىك قايراتكەرلەرى مەن سوعان قاراستى ورگاندار وتكەن بىرنەشە جىلدا ازەربايجان رەسپۋبليكاسىنىڭ يزرايل جانە اقش-پەن ستراتەگيالىق وداعىنىڭ قاراباق قايشىلىعىن وسى مۇسىلمان ەلىنىڭ مۇددەسىنە وراي شەشە الادى دەپ كورسەتكىسى كەلگەن. الايدا، لاۆروۆتىڭ سوزدەرى وسىنداي جارنامانىڭ كەرى جاعدايىن دالەلدەپ وتىر.

ازەربايجان رەسپۋبليكاسى مەن ارمەنيا كۇشتەرىنىڭ تۇيىسكەن تۇستارىندا جاعدايدىڭ قيىندىعىن ەسكەرىپ، بۇۇ-نىڭ قارسىلاسۋشى تاراپتار باكۋ مەن ەرەۆان باسشىلارىن كەلىسسوزگە كەلۋگە شاقىرۋىنىڭ وسى حالىقارالىق ۇيىمنىڭ وڭتۇستىك كاۆكازداعى شيەلەنىستى ازايتۋ سالاسىندا جاساعان وڭ قادامى ەكەنىندە كۇمان جوق. وتكەن بىرنەشە جىلدىڭ ىشىندە قاراباق قايشىلىعىن دوعارۋعا قاتىستى بۇۇ بەيتاراپ رولگە يە بولعاندىقتان، ازىراق پىكىر بىلدىرەتىن. مۇنىمەن قوسا، وتكەن بىرنەشە جىل ىشىندە بۇۇ قاۋىپسىزدىك كەڭەسىنىڭ ارميان كۇشتەرىن ءازىربايجان رەسپۋبليكاسىنىڭ جەرىنەن شىعارۋ تۋرالى 4 قارارى جاريالانعانىنا قاراماستان، بۇل قارارلار تەك قاعاز جۇزىندە قالىپ، ىسكە اسپادى. ايماق ماسەلەلەرى جونىندەگى ساراپشىلاردىڭ ايتۋىنشا، بۇۇ-نىڭ وكىلدەرى باكۋ مەن ەرەۆان باسشىلارىن كەلىسسوزدەر ۇستەلىنە كەلۋگە شاقىرۋدىڭ ورنىنا قاۋىپسىزدىك كەڭەسى قارارلارىنىڭ ورىندالۋىن باسا ايتقانى ءجون. قارارلاردىڭ قابىلدانعانىنا 20 جىلدان استام ۋاقىت ءوتتى، الايدا بۇل سالادا ەشقانداي ءىس اتقارىلعان جوق. وسىنداي شىندىقتارعا قاراماستان، قاراباق قايشىلىعىنان تۋىنداپ وتىرعان ايماقتىق قاۋىپ-قاتەرلەردىڭ قازىرگى ۇدەرىسى مەن بۇۇ-نىڭ رولىنەن قاپى قالماۋ قاجەت. بۇل حالىقارالىق ۇيىم باكۋ مەن ەرەۆاننىڭ جەر داۋىنا ارالاسىپ، ايماقتىق وزگەرىستەردە سىندارلى ءرول اتقارا الادى. وسىعان قاتىستى، بۇۇ باس حاتشىسىنىڭ رەسمي وكىلى فارحان حاقتىڭ جۋىرداعى سوزدەرىن وسى ۇيىمنىڭ ازەربايجان رەسپۋبليكاسى مەن ارمەنيا قايشىلىعىن توقتاتۋعا بايسالدى تۇردە اتسالىسۋىنىڭ باستاماسى دەپ تۇسىنۋگە بولادى.

باكۋ مەن ەرەۆاننىڭ جەر داۋىن شەشۋگە باعىتتالعان حالىقارالىق تالپىنىستارعا قاراماستان، ازەربايجان رەسپۋبليكاسى مەن ارمەنيانىڭ كەيبىر جوعارى لاۋازىمدى قايراتكەرلەرىنىڭ سوزدەرى ءاردايىم قاراباق بەيبىت كەلىسسوزدەرى ۇدەرىسىنە تەرىس اسەرىن تيگىزىپ كەلدى. سونىڭ ىشىندە باكۋ مەن ەرەۆان باسشىلارىنىڭ سوڭعى ايلاردا سوعىستى قايتا باستاۋ تۋرالى ءوزارا قوقان-لوققىلارىن ايتۋعا بولادى. سونداي-اق، ازەربايجان رەسپۋبليكاسىنىڭ پرەزيدەنتى يلحام اليەۆتىڭ سوڭعى سوزدەرىندە ارمەنيانىڭ بولمىسى مەن ەگەمەندىگىنە كۇمان كەلتىرىلگەن بولاتىن.

“The Qazaq Times”