فوتوكوللاج

قىرعىزستاننىڭ نارىن وبلىسى اتباشى اۋىلىندا جۇزدەگەن ادام قىتاي جوبالارىن جۇزەگە اسىرۋعا قارسىلىق ءبىلدىردى.

نارازى توپ قىرعىزستان ۇكىمەتىنەن 275 ميلليون دوللار جۇمسالاتىن لوگيستيكالىق ورتالىق سالۋ جوسپارىنان باس تارتۋدى تالاپ ەتتى. قارسىلىق اكتسياسىنا قاتىسۋشىلار «لوگيستيكالىق ورتالىق سالۋعا قارسىمىز»، «قىرعىز جەرى قىتايعا بەرىلمەسىن» دەپ ۇرانداتتى. لوگيستيكالىق ورتالىق سالۋ تۋرالى قىرعىز ۇكىمەتى 2019 جىلى قىرعىزستانعا كەلگەن قىتاي توراعاسى شي جينپيڭمەن ۋاعدالاسقان. جوسپار بويىنشا اتالعان ورتالىققا وندىرىستىك قۋاتى از كاسىپورىنداردى ورنالاستىرىپ، ولارعا ساۋدا جەڭىلدىكتەرىن بەرۋ كوزدەلگەن.

بىلتىردان بەرى قىرعىزستاندا قىتاي ساياساتىنا، قىتايلىق جوبالارعا قارسى نارازىلىق شەرۋلەرى بىرنەشە مىرتە وتكەن. 2018 جىلى جەلتوقساندا قىتايدا تۋىستارى جوعالىپ كەتكەن بىرنەشە قىرعىزستان ازاماتى پرەزيدەنت سوورونباي جەەنبەكوۆتەن كومەك سۇراعان. كەيىننەن قىتايداعى ەتنيكالىق قىرعىزداردى قورعاۋ كوميتەتى قۇرىلىپ، جاعدايدىڭ ءمان-جايىن حالىق پەن بيلىككە ءتۇسىندىرۋ ماقساتىندا جيىن وتكەن. 5 جەلتوقساندا بەلسەندىلەر بىشكەك قالاسىنداعى بىرىككەن ۇلتتار ۇيىمى عيماراتىنىڭ الدىندا حالىقارالىق قاۋىمداستىق وكىلدەرى مەن بۇۇ باس حاتشىسى انتونيۋ گۋتەررەشتەن قىتايدا قىسىم كورىپ جاتقان قىرعىز-قازاق ۇلتتارىنا اراشا سۇراعان.

قىتايداعى از ۇلتتاردىڭ جەرگىلىكتى بيلىك تاراپىنان قىسىم كورىپ جاتقاندىعى جونىندە وسىعان دەيىن حالىقارالىق باق بەتتەرىندە سان مارتە ايتىلعان. رەسمي بەيجىڭ وزىنە تاعىلعان ايپتاردىڭ بارلىعىن جوققا شىعارىپ، ساياسي ۇيرەنۋ ورتالىقتارىنداعى ادامداردىڭ بارلىعى ءوز ەركىمەن بارعاندىعىن العا تارۋدا. بولجام بويىنشا، قازىرگى تاڭدا قىتايداعى ساياسي ۇيرەنۋ لاگەرلەرىندە ءبىر ميلليونعا جۋىق ادام بار.

"The Qazaq Times"