ترامپتىڭ 4 جاسىندا تۇرعان ءۇيى. فوتو: The Wall Street Journal

تانىمال «The Wall Street Journal» باسىلىمىندا، وسىعان بىرنەشە كۇن بۇرىن ترامپتىڭ بالا كۇنىندە تۇرعان ءۇيىنىڭ ساتىلعانى تۋرالى ارناۋلى ماقالا باسىلدى. ءۇي اۋكتسيونعا قويۋ ارقىلى ساتىلعان. ەڭ قىزىعى، ساتىپ الۋعا تالاسقانداردىڭ باسىم كوبى قىتايلىق قالتالىلار بولىپتى. قىتايعا قىرىن قارايتىن ترامپتىڭ تۇراعى قىتايلىقتار ءۇشىن نەگە سونشا ءوتىمدى بولدى؟ ەلي روزەنبەرگ  جانە سارا ماسلين ناير ەكەۋىنىڭ ماقالاسى وسىنى باياندايدى.

قاڭتار ايىنىڭ سوڭى. كۋينەس تۇرعىندار رايونىنىڭ ارتىنداعى يامايكا جوعارى دارەجەلى تۇرعىندار اۋلاسىندا شاعىن جاناما جولمەن بىرنەشە قارا ءتۇستى «Escalade» اۆتوكولىكتەرى كىرگەن. ولار قاراپايىم تۋدرو ستيلىندەگى كوتتەدجدىڭ الدىنا كەلىپ توقتادى. ال، بۇل كوتتەدج بولسا پرەزيدەنت ترامپنىڭ ءتورت جاسىندا تۇرعان ەسكى تۇراعى.  كورشىلەردىڭ ايتىسىنا قاراعاندا، كەلگەن ساۋلەتتى كوستيۋم كيگەن قىتايلىق ەر ادام اۆتوكولىكتەن تۇسكەن.

كورشىلەرى بۇل ءۇيدىڭ قاڭتار ايىنان باستاپ اۋكتسيونعا شىعارىلعانىن، سودان بەرى ءۇيدى كورۋگە كەلگەندەردىڭ اياعى ۇزىلمەدى دەيدى. (ولاردىڭ جەكە ءومىرىنىڭ قاۋىپسىزدىگى ءۇشىن تەك كورشىلەر دەپ قانا اتالدى/ The Wall Street Journal)  سونىڭ باسىم كوبى شەتەلدىكتەر، اسىرەسە قىتايلىقتار بولعان ەكەن. تەك وتكەن اپتا دا عانا بۇل ءۇيدىڭ ساتىلعانى تۋرالى اۋكتسيوننىڭ سايتىندا بەلگىلى بولعان.  بۇل ءۇي نە ءۇشىن سونشاما كوپ قىتايلىق قالتالىلاردىڭ قىزىعۋشىلىعىن وياتتى؟ بۇل سۇراق كورشىسىنە دە قىزىق سەكىلدى. ول: «بۇل ءۇيدىڭ قىزىعارلىق نەسى بار ەكەنىن تۇسىنە المادىم؟»، – دەيدى تاڭدانىپ.

ترامپتىڭ بالا كۇنىندە تۇرعان ءۇيىن ساتۋشى، امەريكالىق جشس جىلجىمايتىن مۇلىكتى ساتۋمەن اينالىساتىن كومپانيا. ال ساتىپ الۋشىنىڭ كىم ەكەنى ازىرگە انىق ەمەس. الايدا وسىعان قاتىسى ينسايدەردىڭ ايتۋىنا قاراعاندا، بۇل تۇرار-جايدى قىتايلىق قالتالى ايەل ساتىپ الىپتى. مامىلە بارىسىنداعى جىلجىمايتىن مۇلىككە جاۋاپتى زاڭگەر مايكل تاڭ ( Michael X. Tang) ەسىمدى ادۆوكات بولىپ شىقتى. ال ونىڭ حاتشىسى سەيسەنبى كۇنى، بۇل ءىس تۋرالى تاڭنىڭ ەشقانداي دا تۇسىنىكتەمە بەرە المايتىندىعىن ايتقان.

ترامپپەن قاتىسى بار بولعان جىلجىمايتىن مۇلىكتەر اراسىندا بۇل ءۇي كوپ ادامنىڭ قىزىعۋشىلىعىن وياتقان. ءتىپتى، ترامپتىڭ بۇل قونىستا تۇرماعانىنا دا بىرنەشە ونداعان جىل وتسە دە،  تۇرار جاي ساتىپ الۋشىلاردى قىزىقتىرىپ وتىر. اۋلاسى اينالدىرا قورشالماعان، تەك كۇلگىن جانە اق ءتۇستى ءيىستى گۇلدەر ەگىلگەن. ازىرگە ءۇيدىڭ مونتازداي ەتىپ تازالانعانى انىق.

حەتي حان نيۋ-يوركتەگى جىلجىمايتىن مۇلىك اگەنتى بولىپ جۇمىس جاسايدى. ول ترامپتىڭ كونە تۇراعىنىڭ ساتىلىمعا شىعارىلعانىن ەستىگەندە-اق، قىتايلىقتاردىڭ قىزىعۋشىلىعىن تۋدىراتىنىنان كۇماندانباعان ەكەن. ول: «مەن بىلەمىن، ترامپ بولسا امەريكاداعى داۋلى ادام بولىپ سانالادى. بىراق، قىتايلىقتار ءۇشىن، ترامپ – ەڭ تابىستى تانىمال تۇلعا. بۇل ساتىپ الۋشى ايەل جونىنەن الىپ ايتقاندا، ترامپتىڭ تابىسقا جەتكەن كاسىپكەرلىگى قىزىقتىرىپ وتىر. ساۋداداعى تابىسكەرلىك قىتايدا ەڭ ءبىر اۋىز تولتىرا ايتاتىن ابىرويلى ءىس سانالادى»، – دەگەن كوزقاراسىن ءبىلدىردى.

ترامپ ساياساتتا تاجىريبەسىز تۇلعا بولسا دا، قازىر امەريكا قۇراما شتاتىنىڭ پرەزيدەنتى بولىپ تاعايىندالدى. حەتي حان بۇنى ءبىر كينوعا كوبىرەك ۇقساتادى ەكەن. ءبىر ەسەپتەن الىپ ايتقاندا بۇل تۇلعانىڭ ومىرىندە تابىسقا جەتۋ، جولى بولۋدىڭ ەپيزودتارى كوپ. كوپتەگەن قىتايلىقتار ءۇشىن ترامپتىڭ جولىن وزىنە بەرسىن دەگەن ىرىمعا كوبىرەك ۇقسايتىن ىنتا-نيەت بولدى. سونىڭ ارقاسىندا بۇل ءۇي ساتىلىمعا شىعارىلىسىمەن كوپتەگەن قىتايلىقتاردىڭ  قىزىعۋشىلىعىن تۋدىردى دەپ قارايدى.

اۋد: ەستاي بوجان

“The Qazaq Times”