يران پرەزيدەنتى اسكەري كۇشتەرى اتىپ تۇسىرگەن ۋكرايناعا تيەسىلى جولاۋشىلار ۇشاعى تۋرالى مالىمدەمە جاسادى. ول ءىستى اشىق تەكسەرىپ، تولىق انىقتاۋعا ۋادە ەتتى.

«ازاماتتىق ۇشاققا قارسى زىمىران اتۋ كەشىرىلمەيتىن قاتەلىك. ءبىز بۇل ءىستىڭ تەكسەرىلۋىن قاداعالايمىز»، – دەدى پرەزيدەنت حاسان رۋحاني مەملەكەتتىك تەلەارنا ارقىلى جاساعان مالىمدەمەسىندە. ول جانە ءىستى تولىق انىقتاپ بولعاننان كەيىن ۇشاق ىسىنە قاتىستى بارلىق دەرەكتىڭ اشىق جاريا بولاتىنىن بىلدىرگەن.

ەستەرىڭىزگە سالا كەتەيىك، يران اۋە كۇشتەرى اقش-تىڭ يراكتاعى اسكەري بازاسىنا زىمىران سوققىسىن بەرگەن ءتۇنى تەھراننان اۋەگە كوتەرىلگەن ۋكرايناعا تيەسىلى جولاۋشىلار ۇشاعى قۇلاعان بولاتىن. العاشىندا تەحنيكالىق اقاۋ سەبەبىن كولدەنەڭ تارتقان يراندىق ۇكىمەت كەيىن اسكەري كۇشتەردىڭ ابايسىزدا اتىپ قۇلاتقانىن مويىندادى. بۇل وقيعادان كەيىن يراندا ۇكىمەتكە قارسى نارازىلىق شەرۋى ءوتتى. ولار بيلىكتىڭ اۋىسۋىن تالاپ ەتۋدە. نارازىلىق ءالى جالعاسىپ جاتىر.

“The Qazaq Times”