ۇلىبريتانيانىڭ يرانداعى ەلشىسى روبەرت ماكەر تەھراندا ەرەۋىل ۇيىمداستىرعانى ءۇشىن بىرنەشە ساعاتقا ۇستالدى.

مالىمەتتەر بويىنشا، يران ۋكراينالىق ۇشاقتى اتىپ قۇلاتقانىن مويىنداعاننان كەيىن ءبىر توپ ستۋدەنت ۋنيۆەرسيتەت الدىنا نارازىلىق شەرۋگە شىققان.

Tasnim اگەنتتىگى: «ماكەر ۋنيۆەرسيتەت الدىنداعى شەرۋشىلەر اراسىندا بولدى. ەلشى نارازىلىق شاراسىنا قاتىسۋشىلاردى راديكالدى ارەكەت جاساۋعا شاقىرعانى ءۇشىن ايىپتالدى»، — دەپ حابارلادى.

31 جەلتوقساندا اقش-تىڭ باعداتتاعى ەلشىلىگى الدىندا نارازىلىق شاراسى بولىپ، شەرۋشىلەردىڭ الدى ەلشىلىك عيماراتىنا شابۋىلداعان. امەريكا بۇل نارازىلىقتىڭ ارتىندا يران تۇر دەپ ەسەپتەيدى. نارازىلىق اقش كۇشتەرىنىڭ يراكتاعى جانە سۇرياداعى شابۋىلىندا شيت مۇسىلماندارى قازا تاپقانى تۋرالى مالىمەت تاراعان سوڭ تۇتانعان ەدى.

يسلام رەۆوليۋتسياسى ساقشىلار كورپۋسىنىڭ «قۇدس كۇشتەرى» ارنايى جاساعىنىڭ قولباسشىسى سۇلەيماني 3 قاڭتاردا باعداتتاعى اقش-تىڭ اۋە شابۋىلى كەزىندە مەرت بولعان. ونى ولتىرۋگە اقش پرەزيدەنتى دونالد ترامپ بۇيرىق بەرگەن. «قۇدس كۇشتەرى» يراننىڭ سىرتتاعى اسكەري وپەراتسيالارىنا قاتىسقان. بۇعان دەيىن اقش-تان «كەك الاتىنىن» مالىمدەگەن يران 8 قاڭتاردا اقش-تىڭ يراكتاعى بىرقاتار نىساندارىن زىمىرانمەن اتقىلادى.

"The Qazaq Times"