كورنەكى سۋرەت. فوتو: اشىق دەرەككوز

بۇرناعى شىعارماشىل جۋرناليست رەتىندە، كەيىننەن 2017 جىلدىڭ كوكتەمىنەن بەرى «جاس الاش» گازەتىنىڭ رەداكتور قىزمەتىندە جەمىستى ەڭبەك ەتكەن رۋسلان ەربوتانىڭ ورنىنا جاڭا كادر كەلدى.  

ەندىگى جىلى ۇلىس تويى قارساڭىندا جارىق كورگەنىنە 100 جىل تولاتىن قارا شاڭىراق باسىلىمنىڭ باسىنان كەشىرگەن تاعدىر تاريحى مەن ءمان-ماڭىزى ءوز الدىنا بولەك دۇنيە. ەستى جاستان باستاپ سامايىنا اق تۇسكەن اقساقالعا دەيىن جازدىرىپ وقيتىن بەدەلدى ءارى جاڭاشىل باسىلىم سوڭعى جىلدارى دا ءوز جولىنان اۋىتقىماي، مۇراتىنان جاڭىلماي كەلەدى.

وسى ۋاقىتقا دەيىن 16 مىڭعا تارتا ءنومىرى جارىق كورگەن تاراۋيح گازەت ءوزىنىڭ «حالىقتىڭ كوزى، قۇلاعى ءھام ءتىلى» بولۋدا ايانىپ قالعان جوق. ونى قولدان-قولعا الىپ وقۋ داعدىعا اينالعان باسىلىمنىڭ مۋلتيمەديالىق پلاتفورما تۇرىندە جانە الەۋمەتتىك جەلىلەردە قولجەتىمدى بولا تۇسۋىنەن كورەمىز.   بۇرىنعى رەداكتور رۋسلان ەربوتا facebook جەلىسىندەگى جەكە پاراعىندا «گازەت تيراجىن قۇلاتپاي ۇستاپ تۇردىق، سايتتىڭ كۇندىك وقىلىمىن ون مىڭنان اسىردىق» دەگەنى مەديانىڭ تۇپكىلىكتى ترانسفورماتسيالانۋ كەزىندە ەكىنىڭ ءبىرىنىڭ قولىنان كەلە بەرمەيتىن جاۋاپتى مىندەت. سوندىقتان رەداكتسيا اتىنان ارىپتەسىمىز، ازاماتتىق جۋرناليستيكانىڭ شىعارماشىل وكىلى رۋسلان ەربوتانىڭ الداعى ەڭبەك جولىنا زور تابىس پەن جاڭا بيىك بەلەستەر تىلەيمىز.

ال وتاندىق باسپاسوزدە ايرىقشا ورنى بار «جاس الاشتىڭ» جاڭا باس رەداكتورى بولىپ تاعايىندالعان جۋرناليست ينگا يمانبايعا ينتەرنەت ءارى گازەتتى باسىلىمنىڭ بولاشاعىمەن بىرگە كاسىبي جەتىستىكتەرگە جەتۋىنە تىلەۋلەستىك تانىتامىز.

قازاق حالقىنىڭ قۇقىقتىق ءارى قوعامدىق ساناسىندا ۇلكەن سىلكىنىس تۋدىرعان 2019 جىلدىڭ ونە بويىندا باسىلىم ارقانداي ماڭىزدى وقيعالاردى نازارىنان قالت جىبەرمەي، جاڭا ايدارلارمەن تولىسىپ، زامان تالابىنا ساي سۇرانىسقا سۋساعان كوزىقاراقتى وقىرمانعا اسا وزەكتى تاقىرىپتار بويىنشا بەينەكونتەنت ۇسىنا الدى. الداعى كەزدە دە «جاس الاشتى» ءيسى قازاق ەلىنىڭ ءبىر اتى الاش جۇرتىنىڭ جوعىن جوقتاپ، تاقسىرەتىن تۇگەندەپ، قاجەتىنە جارايتىن مۇددەسىنەن تايماس دەگەن ۇمىتتەمىز.

"The Qazaq Times"