سوت ارمان شوراەۆتىڭ ارىزىن قاراۋسىز قالدىردى

6 قاڭتار الماتىدا جەتىسۋ اۋدانىنىڭ سوتى ارمان شوراەۆ تۇسىرگەن ارىز بويىنشا، بەلگىلى ادۆوكات ابزال قۇسپان مەن بەلسەندى جۋرناليست ساۋلە ابدىلداحانقىزىنا قاتىستى شاعىمدى قاراۋسىز قالدىردى. 

سۋديا سۆەتلانا سۋحانوۆا اكىمشىلىك كودەكستە كورسەتىلگەن 168, 279, 280, 268, 269 باپتارىنا سۇيەنە وتىرىپ، ارمان شوراەۆتىڭ 2019 جىلدىڭ 6 قازان كۇنى Facebook جەلىسىندە جاريالانعان ماتەريالعا بايلانىستى ابزال قۇسپان مەن ساۋلە ابدىلداحانقىزىنان مورالدىق شىعىن تالاپ ەتكەن ارىزىن قاراۋسىز قالدىردى. سوتقا ارمان شوراەۆتىڭ ءوزى قاتىسپادى. سۋديا مەن جاۋاپكەر جاقتىڭ ادۆوكاتتارى ارىزدانۋشىنىڭ ۋاكىلى ۇسىنعان ءىس نىسانىن، ياعني «ادۆوكات پەن ءجۋرناليستىڭ تىكەلەي ەفيردەگى سۇقباتىنىڭ» ورىسشاعا اۋدارىلعان، بىراق نوتاريالدى كۋالاندىرىلماعان نۇسقاسىنا كۇمانمەن قاراپ، قابىلداماي قويدى. كاسىبي ەمەس اۋدارمانىڭ بىرنەشە قاتەسى بەلگىلى بولعان سوڭ اۋدارما كەرى قايتارىلدى.

بۇعان دەيىن بەلگىلى بيزنەسمەن ارمان شوراەۆ ابزال قۇسپان مەن ساۋلە ابدىلداحانقىزىن ءوزىن يسلام ابىشەۆ ىسىنە ارالاستىردى دەپ ايىپتاپ، مورالدىق وتەماقىعا10 ميلليون تەڭگە تالاپ ەتىپ، سوتقا شاعىمدانعان.

ارىزدانۋشى تالاپكەر تاراپ شاعىمدى ورىس تىلىندە جازعاندىقتان، سوت وتىرىسى ورىسشا ءوتتى. پروتسەسكە اۋدارماشى شاقىرتىلدى. ابزال قۇسپانمەن حابارلاسقانىمىزدا ول بىتىمگە كەلۋدەن باس تارتقانىن ايتتى. ادۆوكات:

– قاناعاتتاندىرمادى ەمەس، بۇل جەردە تاپ-تازا پروتسەستىك زاڭ بۇزۋشىلىق. پروتسەستىك زاڭ بۇزۋشىلىق، پروتسەستە زاڭ تالاپتارى ساقتالماۋى سەبەپتى سوت تالاپ-ارىزدى قاراۋسىز قالدىردى. ياعني ارىزدانۋشى ارمان شوراەۆ سوتقا دەيىنگى تالاپپەن بىزگە جۇگىنۋى كەرەك بولاتىن. «قازاق ءۇنى» سايتىنا جاساعانداي ول ساۋلە ەكەۋىمىزگە دە سوتقا دەيىنگى تارتىپتە مەنىڭ قۇقىعىمدى بۇزاتىن مىنا جازبانى جويىڭىزدار دەپ ەسكەرتۋ جولداۋى كەرەك ەدى، – دەدى. ونىڭ سوزىنشە، سوت ەشكىمنىڭ قاس-قاباعىنا قاراماي  وبەكتيۆتى شەشىم شىعاردى.

الەۋمەتتىك جەلى قولدانۋشىلارى، ءتىلشى-لينگۆيستەر مەن ابىشەۆ جاقتاستارىن قولداۋشىلاردىڭ پىكىرىنە قاراعاندا، ساۋلە ابدىلداحانقىزى مەن ابزال قۇسپاننىڭ «تاپسىرىس بەرۋشىلەر» تۋرالى سۇحباتىندا ەشقانداي تاڭۋ نە ايىپتاۋ، ناقاق كىنالاۋ ءمانى بايقالمايدى. تەك ءوز قورعاۋىنداعى ادامداردىڭ ايتقانىنا سىلتەي وتىرىپ، تولەۋ ءسوز تۇرىندە ناقتى جەتكىزگەن. ال «...مەنىڭ تاپسىرما بەرگەنىمدى دالەلدەپ بەرسىن. دالەلدەي الماسا، كەشىرىم سۇراسىن» دەگەن شوراەۆتىڭ ءۇمىتى اقتالمادى. سۋديا سوتقا دەيىنگى تارتىپپەن ەسكەرتۋسىز 10 ميلليوندىق وتەماقىنى ورىنسىز دەپ تانىدى.

"The Qazaq Times"