كورنەكى سۋرەت. فوتو: اشىق دەرەككوز

سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتىنىڭ حابارلاۋىنشا،  «قازاقستان تەمىر جولى»  سارى-شاعان جول ديستانتسياسى فيليالىنىڭ ديرەكتورى اسا ءىرى كولەمدە قاراجات ۇرلاعانى ءۇشىن سوتتالدى.

بۇعان دەيىن جامبىل وبلىسىنىڭ سىبايلاس جەمقورلىققا قارسى قىزمەتى «جامبىل ماگيسترالدى جەلىسىنىڭ ءبولىمى» – «قتج» ۇك» اق فيليالىنىڭ سارى-شاعان جول ديستانتسياسى (پچ-48) ديرەكتورى ت.قىدىرباەۆقا قاتىستى تەرگەۋ جۇرگىزگەن بولاتىن.

«ول جانار-جاعارماي ماتەريالدارى مەن باعىتتاما بۇرماسىنىڭ مەتالل بولشەكتەرىن نەگىزسىز ەسەپتەن شىعارۋ ارقىلى اسا ءىرى كولەمدە – جالپى سوماسى 16 ميلليون 78 مىڭ تەڭگە بيۋدجەت قاراجاتىن جىمقىرعانى ءۇشىن كۇدىككە ءىلىندى. تەرگەۋ بارىسىندا كەلتىرىلگەن شىعىن تولىعىمەن وتەلدى»، – دەلىنگەن اگەنتتىك حابارلاماسىندا.

وتكەن اپتانىڭ بەيسەنبىسى، 26 جەلتوقسان قاراعاندى وبلىسىنا قاراستى پريوزەرسك قالالىق سوتىنىڭ ۇكىمىمەن ت.قىدىرباەۆ كىنالى دەپ تانىلىپ، ءومىر بويىنا مەملەكەتتىك قىزمەتتەن شەتتەتىلدى جانە 7 جىلعا شارتتى تۇردە باس بوستاندىعىنان ايىرۋ جازاسى كەسىلدى.

“TheQazaqTimes”