"باستاۋ" حكف افيشاسى. فوتو: bastauiff.kz

بۇگىن الماتىدا ءداستۇرلى «باستاۋ» حالىقارالىق كينو فەستيۆالى باستالادى.

جەلتوقساننىڭ 3-ءى مەن 7-ءى ارالىعىندا وتەتىن VIII حالىقارالىق «باستاۋ» فەستيۆالى «جاڭا بۋىن كينوسى» دەۆيزىمەن وتپەك. شارا  ستۋدەنتتىك جانە دەبيۋتتىك فيلمدەر اياسىندا  جۇزەگە اسىرىلادى.

ءبىر عانا ستۋدەنتتىك قىسقامەترلى فيلمدەر ساناتىنا 21 ەلدەن كەلگەن 43 قىسقامەتراجدى كوركەم، دەرەكتى جانە انيماتسيالىق فيلمدەر كىرگەن. ولاردىڭ قاتارىندا گەرمانيا، اقش، لاتۆيا، ارمەنيا، ءازىربايجان، ءۇندىستان، ليتۆا، سينگاپۋر، تۇركيا، وزبەكستان، ۋكراينا، قىرعىزستان سىندى باسقا دا ەلدەردىڭ فيلمدەرى بار.

بيىل فەستيۆالگە 44 ەلدەن 360 ءوتىنىم كەلىپ تۇسكەن. ولاردىڭ اراسىندا ەڭ كوپ ءوتىنىم رەسەيدەن كەلگەن (60 فيلم). ناتيجەسىندە Bastau Shorts باعدارلاماسىندا 11 رەسەيلىك فيلم ۇسىنىلاتىن بولادى.سونداي-اقايتۋلى بايقاۋعا 6 وتاندىق فيلم ىرىكتەلىنىپ الىنعان، ولار: رەجيسسەر كاميللا بەردىمۇراتوۆانىڭ «تاقسىر» دەرەكتى ءفيلمى، رەجيسسەر ايداربەك ابدۋلقادىردىڭ «تەرەڭ سۋ» انيماتسيالىق ءفيلمى، رەجيسسەر سامعار راقىمنىڭ «اۋىلعا ديپلوممەن» كوركەم تۋىندىسى، ەلامان شاۋبانوۆتىڭ «باۋىر» كارتيناسى، دارينا ماناپوۆانىڭ «ماۋلەن» جانە باعلان قۇدايبەرليەۆتىڭ «تىنىشتىق ءانى» كوركەم فيلمدەرى.

حالىقارالىق «باستاۋ» ستۋدەنتتىك جانە دەبيۋتتىك فيلمدەر فەستيۆالىن «باستاۋ» حكف باس ديرەكتسياسى، «كينوكومپانيا Tanaris Production» جشس، الماتى قالالىق اكىمدىگىنىڭ قولداۋىمەن A Team كومپانياسى، ت.جۇرگەنوۆ اتىنداعى قازاق ۇلتتىق ونەر اكادەمياسى، تۇران ۋنيۆەرسيتەتى، ش.ايمانوۆ اتىنداعى «قازاقفيلم» اق وتكىزەدى.

حالىقارالىق «باستاۋ» كينوفەستيۆالىنىڭ پرەزيدەنتى سەرگەي ءازىموۆتىڭ باستاماسىمەن ىسكە اسقان ءداستۇرلى اۋقىمدى جوبانىڭ قورىتىندىسى مەن جەڭىمپازدارى جەلتوقساننىڭ 7-ءسى بەلگىلى بولادى.

فەستيۆالدىڭ اشىلۋ سالتاناتى بۇگىن اقشام ۋاعىندا، ساعات 19:00-دە «الاتاۋ» ءداستۇرلى ونەر تەاترىندا رەجيسسەر شاريپا ورازباەۆانىڭ «ءماريام» فيلمىمەن اشىلادى.

فەستيۆالدىڭ بارلىق فيلمدەرى Bekmambetov Cinema كينوتەاترلار جەلىسىندە كورسەتىلۋ جوسپارلانعان. حالىقارالىق كينو فەستيۆالىنىڭ ءىس-شارا باعدارلاماسى  مەن كورسەتىلىم كەستەسىن مىنا جەردەن بىلە الاسىز.

"The Qazaq Times"