يران مەن يادرولىق كەلىسىمگە قول قويعان ەلدەر اراسىندا 2015 جىلى جاساسقان كەلىسىم ("ورتاق قادام" كەلىسىمى دەپ تە اتالادى تۋرالى تالقى وتىرىسىن وتكىزبەك. ۆەنادا ورنالاسقان حالىقارالىق ۇيىمدارداعى يران وكىلى كەلىسىمگە قول قويعان ەلدەر اراسىنداعى تالقى 6 جەلتوقساندا وتەتىنىن مالىمدەدى. 

يران مەن 6 ەل (اقش، بريتانيا، فرانتسيا، گەرمانيا، رەسەي جانە قىتاي) اراسىندا اتالعان كەلىسىم 2015 جىلى جاسالعان. بۇل يراننىڭ يادرولىق قارۋعا يە بولۋىنا توسقاۋىل قويىپ، بەيبىت ماقساتتا اتوم ەنەرگياسىن پايدالانۋىنا باقىلاۋ جۇرگىزۋ ماقساتىنداعى كەلىسىم. الايدا، اقش بيلىگىنە دونالد ترامپ كەلگەننەن كەيىن يرانمەن جاساسقان كەلىسىمدى جارامسىز دەپ تاپتى. بىلتىر ماۋسىم ايىندا اقش كەلىسىمنەن بىرجاقتى شىعىپ كەتتى جانە يرانعا باعىتتالعان ەكونوميكالىق سانكتسيالاردى قالپىنا كەلتىردى.

بۇل كەلىسىم تۋرالى داۋ-داماي ءالى دە باسىلار ەمەس. يران مەن اقش اراسىندا 2015 جىلعى كەلىسىمگە ۇقساماعان كوزقاراستار بار. ەكى ەل قايشىلىعىنىڭ دا نەگىزگى سەبەپتەرىنىڭ ءبىرى وسى يادرولىق كەلىسىم ماسەلەسى. اقش كەلىسىمنەن ءبىر جاقتى باس تارتقانىمەن، ەۋروپالىق ليدەرلەر جانە رەسەي مەن قىتاي كەلىسىمدە قالدى. الايدا، يران ەۋروپالىق ءۇش ەلدى كەلىسىمدەگى مىندەتىن ورىنداماي كەلەدى دەپ ايىپتاعان ەدى.

وسىدان بۇرىن، ياعني بيىل 28 ماۋسىمدا بريتانيا، فرانتسيا جانە گەرمانيا يرانمەن جاساسقان كەلىسىمدى تالقىلاۋ وتىرىسىن وتكىزگەن بولاتىن. سول رەتكى تالقىلاۋدان كەيىن دە يران ءوزىنىڭ ۋران بايىتۋ مولشەرىن قاتارىنان بىرنەشە رەت جوعارىلاتىپ، كەلىسىمدى ساقتاماعان وزگە ەلدەر ءۇشىن ەسكەرتۋ جاساعان بولاتىن.

“The Qazaq Times”