مازلۋم ابدي «كاۋس» راديوسىنا سۇحبات بەرگەن. فوتو: VOA.

كۇرد اسكەري جەتەكشىلەرى اقش-تىڭ ءسۇريانىڭ سولتۇستىگىنەن اسكەرىن شەگىندىرۋىن ستراتەگيالىق قاتەلىك رەتىندە باعالادى. كۇردتەر باسقاراتىن ءسۇريا دەموكراتيالىق ارمياسىنىڭ باس قولباسشىسى مازلۋم ابدي (مازلۋم كوبانە دەگەن دە اتى بار) «كاۋس» راديوسىنا بەرگەن سۇحباتىندا وسىنداي پىكىر ءبىلدىردى. ول ءسۇريا دەموكراتيالىق ارمياسىنىڭ اقش پەن تۇركيا اراسىندا جاسالعان اتىستى توقتاتۋ تۋرالى كەلىسىمىن تولىق قابىلداي المايتىنىن ايتقان.

مازلۋم ابدي سۇحباتىندا ءسۇريا دەموكراتيالىق ارمياسىنىڭ اقش-قا دەگەن سەنىمى از ەكەنىن، بىراق «يسلام مەملەكەتى» تەررورلىق ۇيىمدارىنا قارسى سوعىستا ءالى دە ودقاتاس بولاتىنىن بىلدىرگەن.

ەستەرىڭىزدە بولسا، 6 قازاندا اقش پرەزيدەنتى دونالد ترامپ اقش اسكەرلەرىنىڭ ءسۇريانىڭ سولتۇستىك-شىعىس ايماعىنان شەگىنىپ شىعاتىنىن جاريالادى. بىرنەشە كۇننەن كەيىن تۇركيا ارمياسى مەن ونىڭ سۇرياداعى وداقتاس كۇشتەرى كۇردتەر باسقارۋىنداعى ءسۇريا دەموكراتيالىق ارمياسىنا شابۋىل باستادى. كۇرد ليدەرلەرى اقش-تىڭ ارەكەتىن «تۋ سىرتىنان پىشاق سالۋ» دەپ باعالاعان بولاتىن.

ال، وتكەن اپتادا اقش انكاراعا دەلەگاتسيا اتتاندىرىپ، ۋاقىتشا سوعىس توقتاتۋ كەلىسىمىنە قول جەتكىزگەن. ۋاقىتشا سوعىس توقتاتۋ كەلىسىمى بۇگىن، ياعني 22 قازاندا اياقتالماق. وق اتىسپاۋ تۋرالى كەلىسىمگە سايكەس سيريا دەموكراتيالىق ارمياسىنىڭ كۇرد قارۋلى كۇشتەرى جانە وسى ايماقتاعى بەيبىت تۇرعىندار راس-ءال-اين قالاسىنان شىعارىلدى.

مازلۋم ابدي سۇحباتىندا اقش-تىڭ اتالعان ايماقتان شەگىنىپ شىعۋى سۇرياداعى ستراتەگيالىق قاتەلىك رەتىندە باعالادى. ونىڭ ايتۋىنشا بۇل قادام سۇرياداعى تۇراقسىزدىقتى كۇشەيتىپ، ءتۇرلى توپتار اراسىنداعى قارسىلىقتى ارتتىرعان. ونىڭ ۇستىنە تەرروريزمگە قارسى سوعىستا ودقاتاستارىنىڭ سەنىمىنەن ايىرىلعان.

“The Qazaq Times”