امەريكالىق قارۋلى كۇشتەر كەشە ءسۇريانىڭ سولتۇستىگىندەگى اقش-تىڭ ەڭ ۇلكەن اسكەري بازاسىنان شىقتى. پەنتاگون باسشىسى ەسپەر ءسۇريانىڭ سولتۇستىگىنەن شىعارىلعان بارلىق امەريكالىق اسكەرلەر يراكتىڭ باتىسىنا ورنالاساتىنىن، وسى ايماقتا «يسلام مەملەكەتى» تەررورلىق توبىنىڭ قالدىق كۇشتەرىنە قارسى انتيتەررورلىق ميسسيالاردى وتەيتىنىن مالىمدەدى.

بۇدان بۇرىن اقش پرەزيدەنتى دونالد ترامپ ءسۇريادان شىعارىلعان اسكەرلەر قۇراما شتاتتارعا ورالاتىنىن ايتقان بولاتىن. الايدا، ەسپەر بۇل شەشىمدى جوققا شىعاردى. ءسۇريادان شىعارىلعان اسكەرلەر يراكتىڭ باتىس ايماعىنا بارعانىن، جاقىن ارادا اقش-قا قايتپايتىنىن مالىمدەگەن.

اقش قورعانىس مينيسترلىگىنىڭ مالىمدەۋىنشە، يراكتىڭ باتىسىنا بارعان امەريكالىق اسكەرلەر قازىرگە تەررورلىق توپتارعا قارسى شابۋىلدارعا كىرمەيدى. ناتو وداقتاستارىمەن جوسپار جاساعاننان كەيىن عانا ميسسيالارى انىقتالادى.

باعدات پەن ۋاشينگتون اراسىنداعى كەلىسىمدەرگە ساي قازىرگى كەزدە يراكتا 5 مىڭنان استام امەريكالىق جاۋىنگەر بار. 2011 جىلى اقش يراكتاعى اسكەرلەرىنىڭ ميسسيالارى اياقتالعانىن مالىمدەپ، ەلدەن اسكەرلەرىن الىپ كەتكەن. الايدا، 3 جىلدان كەيىن وزدەرىن «يسلام مەملەكەتى» دەپ اتاعان تەررورلىق توپ يراك سولتۇستىگىندە «حاليفات جاريالاعاننان» كەيىن اقش اسكەرلەرى يراكقا قايتىپ ورالعان. بۇدان ءبىر جىل بۇرىن يراك تەررورلىق توپتارعا قارسى كۇرەستى جەڭىستى اقىرلاستىرعانىن مالىمدەگەن.

وتكەن اپتادا اكاراعا بارعان اقش دەلەگاتسياسى ۋاقىتشا سوعىس توقتاتۋ كەلىسىمىنە يە بولدى. كەشە، اقش مەملەكەتتىك حاتشىسى مايك پومپەو كەلىسىمنەن كەيىن ءسۇريانىڭ سولتۇستىگىندە قاقتىعىستاردىڭ ازايعانىن مالىمدەگەن. ول جانە تۇركيانىڭ كەلىسىمدى تولىق ورىنداۋىن قاداعالايتىندارىن جەتكىزدى، ءارى اقش-تىڭ «يسلام مەملەكەتى» تەررورلىق توبىنا قارسى كۇرەسى جالعاسا تۇسەتىنىن ايتقان.

“The Qazaq Times”