اقش انكارانى 5 كۇن سوعىس توقتاتۋعا كوندىردى: ەردوعان سوعىسسىز جەڭىسكە جەتتى مە؟

انكاراعا بارعان اقش دەلەگاتسياسى تۇركيانىڭ كۇرد قارۋلى كۇشتەرىنە قارسى شابۋىلىن ۋاقىتشا توقتاتۋعا كوندىردى. اقش ۆيتسە-پرەزيدەنتى مايك پەنس جاساعان مالىمدەمەدە تۇكيا شابۋىلدى بەس كۇنگە توقتاتاتىنىن، وسى ارالىقتا كۇرد قارۋلى كۇشتەرى تۇركيا شەكاراسىنا جاقىن بۋفەرلىك زونادان شىعىپ كەتەتىنى ايتىلعان.

مايك پەنس باستاپ بارعان دەلەگاتسيا تۇركيا پرەزيدەنتى رەجەپ تايىپ ەردوعانمەن 5 ساعاتتىق كەلىسسوز وتكىزىپ، اقىرى سوعىستى ۋاقىتشا توقتاتۋعا كەلىسىم العان. كەلىسىم بويىنشا، 5 كۇن ىشىندە كۇرد قۇرالدى كۇشتەرى تۇركيا جوسپارلاپ وتىرعان قاۋىپسىز ايماقتان شىعىپ كەتەتىن بولسا، وندا تۇركيا تۇراقتى تۇردە كەلىسىمدى ساقتاپ، شابۋىل ارەكەتتەرىن جالعاستىرمايدى. ال، اقش بولسا انكاراعا باعىتتاعان سانكتسياسىن قايتارىپ الادى.

مايك پەنس اقش دەلەگاتسياسى قان توگىستى توقتاتۋ سىندى ماقساتىنا جەتكەنىن ايتتى. «بۇل كەلىسىم ءومىردى قورعاۋ ءۇشىن. كەلىسىم قان توگىستى توقتاتادى. پرەزيدەنت ترامپ سول ماقساتتا جىبەردى»، – دەدى پەنس.

بۇل ارينە ۋاقىتتا سوعىس توقتاتۋ. كۇردتەرگە بەرىلگەن بەس كۇن ىشىندە قانداي وزگەرىستەر بولاتىنى بەلگىسىز. بىراق، وپپوزيتسيامەن قوسا، ءوز پارتيالاستارىنىڭ قىسىمى دا جاعادان الىپ تۇرعان ترامپ دەرەۋ ۋاقىتتىق جەڭىسىن جاريالاپ ۇلگەردى.

بىراق، ويلاپ قاراساق كەلىسىم ءبارى بىردەي ەردوعاننىڭ جەڭىسى بولاتىنداي. سەبەبى، ول اسكەري كۇشپەن ىعىستىرىپ تاستاماق بولعان كۇرد كۇشتەرى ەندى بەس كۇن ىشىندە تۇركيا بەلگىلەگەن ايماقتان شىعىپ كەتۋى كەرەك. ال، كۇرد كۇشتەرى شىنىمەن دە وڭىردەن شىعىپ كەتسە ايماقتى تۇركيا قارۋلى كۇشتەرى ءوز باقىلاۋىنا الادى. ەگەر بۇلاي بولعاندا ايماقتى سوعىسسىز قولعا كەلتىردى دەسە دە بولادى.

كۇرد كۇشتەرىنىڭ ليدەرى ۋاقىتشا سوعىس توقتاتۋ كەلىسىمىن قابىل الاتىنىن ءبىلدىردى. بىراق، سوعىس ءورتى سۇراپىل ايماقتاردا عانا كەلىسىمدى قابىلدايتىنىن ايتقان، تۇركيا جوسپارلاعان بارلىق ايماقتى تاستاپ شىعۋ تۋرالى ۋادە بەرمەگەن. كەلىسىمنىڭ قانشالىقتى جۇزەگە اسارى بەلگىسىز. سەبەبى، جاڭا كەلىسىم اقش پەن تۇركيا اراسىندا عانا بولدى. ءسۇريا، رەسەي، كۇرد جانە وزگە تاراپتار بۇل كەلىسسوزگە قاتىسقان ەمەس.

“The Qazaq Times”