ساۋد ارابياسى حالىقارالىق قاۋىمداستىقتان يرانعا قىسىمدى ارتتىرۋعا شاقىردى. فوتو: Saudi FM.

ساۋد ارابياسى حالىقارالىق قاۋىمداستىقتان يرانعا باعىتتالعان قىسىمدى ارتتىرۋدى سۇرادى. وتكەن اپتا سوڭىنداعى بۇۇ باس اسسامبلەياسىنىڭ سەسسياسىندا بايانداما جاساعان ساۋد ارابياسى ءسىم باسشىسى مۇناي نىساندارىنا جاسالعان شابۋىلدارعا بايلانىستى يراندا ايىپتادى جانە وسىعان وراي يرانعا قارسى قىسىمدى كۇشەيتۋگە شاقىردى.

ساۋد ارابياسىنىڭ ءسىم باسشىسى يبراھيم بەن ابدۋلازيز بەن ابدۋللا ءال-اسساف باس اسسامبلەيانىڭ سەسسياسىندا سويلەگەن سوزىندە يراننىڭ وڭىردەگى كەڭەيىپ كەلە جاتقان ىقپالىن توقتاتۋدىڭ ماڭىزى تۋرالى كوبىرەك توقتالدى. ساۋد ارابياسىنىڭ يرانعا قارسى قىسىمدى ارتتىرۋ تۋرالى تالاپتارىن يزرايل تارابى دا قولدايتىنىن بىلدىرگەن.

بۇدان بىرنەشە جىل بۇرىن يزرايل پرەمەرى بەنيامين نەتانياحۋ يران قاۋپىنىڭ كۇشەيۋى ەۆرەي مەن اراب وداعىنىڭ قالىپتاسۋىنا ىقپال ەتەدى دەگەن پىكىرىن بىلدىرگەن. سول كەزدە بىرقاتار اراب ەلدەرى كۇشەيىپ كەلە جاتقان پالەستين ماسەلەسىن العا تارتا وتىرىپ، بۇل پىكىردى ورىنسىز دەپ ساناعان. الايدا، وڭىردەگى يران ىقپالىنىڭ ارتۋى ساۋد ارابياسى مەن يزرايلگە مۇددەلىك ورتاقتىقتار بەرە الدى. يراننىڭ بىرقاتار اراب ەلدەرىندەگى ىقپالى ارتقان سايىن يزرايل مەن ساۋد ارابياسى اراسىندا بايلانىس كۇشەيە ءتۇستى.

تەھران بيلىگى بولسا، وڭىردەگى قايشىلىقتار مەن قاقتىعىستاردىڭ باستى قوزعاۋشىسى ساۋد ارابياسى مەن يزرايل ەكەنىن ايتادى. ءيزرايلدىڭ پالەستينانى جاۋلاۋ ارەكەتتەرى مەن ساۋد ارابياسىنىڭ يەمەندەگى سوعىسى بۇنىڭ باستى دالەلى دەپ كورسەتەدى. ءبىر سوزبەن ايتقاندا وسى ۇشجاقتى قايشىلىقتار اراسىندا ورتا شىعىس ءالى دە داۋلى ايماق كۇيىندە قالىپ كەلەدى.

“The Qazaq Times”