پومپەو مەن مۇحاممەد بين سالمان كەزدەستى. فوتو: Reuters.

اقش مەملەكەتتىك حاتشىسى مايك پومپەونىڭ ساۋد ارابياسىنداعى ساپارى كەزىندە اقش-تىڭ ەكى سەناتورى ترامپ ۇكىمەتىنە ەسكەرتۋ حات جولدادى. ولار ترامپ ۇكىمەتى ساۋد ارابياسىمەن يادرولىق ىنتىماقتاستىق تۋرالى قول قويماۋىن تالاپ ەتكەن. سەناتورلار ەگەر بۇنداي كەلىسىم جاسالسا ورتا شىعىستا يادرولىق قارۋ جارىسى باستالۋى مۇمكىن دەپ الاڭدايدى.

دەموكراتيالىق سەناتورلار ەد ماركي مەن جەفف مەركلي مەملەكەتتىك حاتشى پومپەو مەن ەنەرگەتيكا ءمينيسترى ريك پەرريگە ەسكەرتۋ حاتىندا: «ساۋد ارابياسىمەن يادرولىق تەحنولوگيالاردى ءبولىسۋ ماسەلەسى، اسىرەسە قاۋىپسىزدىكتى قامتاماسىز ەتۋ كەزىندە، ساۋد ارابياسىنا يادرولىق قارۋعا يە بولۋ مۇمكىندىگىن بەرەدى»، – دەلىنگەن.

ەد ماركي مەن جەفف مەركلي ەكەۋى دە حالىقارالىق قاتىناستار جونىندەگى كوميتەتتىڭ مۇشەلەرى. ولار بۇل كەلىسىم اقش-تىڭ ساۋد ارابياسىنداعى ىقپالىن جاقسارتا المايدى دەپ سانايدى. ولار اتالعان ەسكەرتۋ حاتىندا ەگەر ترامپ ۇكىمەتى ساۋد ارابياسىنا يادرولىق قارۋعا يە بولۋعا مۇمكىندىك بەرەتىن كەلىسىمگە قول قويسا، كونگرەستىڭ مۇناي كەلىسىمىن توقتاتاتىنىن ەسكەرتكەن.

سەناتورلار ساۋد ارابياسىنىڭ «ادام قۇقىعى مەن الەۋمەتتىك تەڭدىكتى ەلەۋسىز قالدىرىپ كەلگەنىن» العا تارتا وتىرىپ، ولاردى «جارىلقاۋعا» بولمايتىنىن ايتقان.

ساۋد ارابياسى اقش-پەن يادرولىق كەلىسىم جاساۋ ارقىلى يادرولىق قارۋدى تاراتپاۋ سىندى قاتاڭ شارتتاردان، سونىڭ ىشىندە بۇۇ قارارىنان جالتارۋدا. كوپتەگەن ساراپشىلار اقش-پەن يادرولىق ەنەرگەتيكا كەلىسىمىن جاساسۋ ساۋد ارابياسىنا ۋران بايىتۋدىڭ جانە يادرولىق قارۋدى قامتاماسىز ەتەتىن قاۋىپتى قالدىقتاردى جاراتۋعا مۇمكىندىك بەرە الادى دەپ سانايدى.

وسىدان بۇرىن ساۋد پاتشالىعىنىڭ تاق مۇراگەر حانزاداسى مۇحاممەد بين سالمان: «ەگەر يران يادرولىق باعدارلاماسىن جۇزەگە اسىرسا، ساۋد ارابياسى يادرولىق قارۋ ىزدەيتىن بولادى»، – دەپ مالىمدەمە جاساعان ەدى.

اقش-تىڭ مەملەكەتتىك دەپارتامەنتى مەن ەنەرگەتيكا مينيسترلىگى ءالى دە سەناتورلاردىڭ حاتىنا جاۋاپ بەرگەن جوق.

“The Qazaq Times”