حۋسيتتەردىڭ اۋە شابۋىلى. فوتو: Irna.

سەنبى كۇنى اقش پرەزيدەنتى دونالد ترامپ پەن ساۋد ارابياسىنىڭ تاق مۇراگەر حانزاداسى مۇحاممەد بين سالمان تەلەفون ارقىلى سويلەستى. سويلەسۋدە يەمەندەگى حۋسيت كۇشتەرىنىڭ ساۋد ارابياسىنىڭ مۇناي نىساندارىنا جاساعان شابۋىلى تۋرالى تالقىلادى. ترامپ «ساۋد ارابياسىن قورعاۋعا دايىن ەكەنىن» ءبىلدىردى.

وتكەن سەنبىدە يەمەندەگى يران قولداۋىنداعى حۋسيت كۇشتەرى جانە ونىڭ جاقتاستارى ساۋد ارابياسىنىڭ Aramco اتتى ۇلتتىق مۇناي كومپانياسىنىڭ نىساندارىنا شابۋىل جاساعان بولاتىن. يراندىق IRNA اقپارات اگەنتتىگىنىڭ حابارىنا سەنسەك، اۋە شابۋىلىنا 10 ۇشقىشسىز ۇشاق پايدالانىلعان. ولار ساۋد ارابياسىنىڭ ۇلتتىق مۇناي كومپانياسىنا قاراستى «باحيك» جانە «حاريس» مۇناي وڭدەۋ زاۋىتتارىنا اۋەدەن شابۋىل جاساعان.

حۋسيت تارابى تاراتقان مالىمدەمەدە، بۇل شابۋىلدى «ساۋد ارابياسى باستاعان كواليتسيانىڭ يەمەندەگى قىلمىستارىنا جاۋاپ بەرۋ» دەپ اتاعان. ال، اقش پرەزيدەنتى بۇل شابۋىل اقش پەن الەم ەكونوميكاسىنا تەرىس اسەرىن تيگىزەدى دەپ باعالادى.

اقش مەملەكەتتىك دەپارتامەنتى شابۋىلعا بايلانىستى يراندى دا ايىپتادى. مەم. حاتشى مايك پومپەو كەشە جاساعان مالىمدەمەسىندە: «حۋسيت كۇشتەرىنىڭ جاساعان شابۋىلىنىڭ ارتىندا تەھران تۇر»، – دەدى. سونداي-اق، ساۋد ارابياسىنىڭ مۇناي تاپشىلىعىنىڭ ورنىن تولتىرۋعا دايىن ەكەنىن بىلدىرگەن.

ايتا كەتەيىك، تامىز ايىنىڭ ورتا شەنىندە يەمەندەگى حۋسيت كۇشتەرى ساۋد ارابياسىنىڭ مۇناي نىساندارىن نىساناعا العان ءىرى شابۋىل بولاتىنىن ەسكەرتكەن بولاتىن.

“The Qazaq Times”