اقش كەلىسسوزدى توقتاتتى، تاليبان ترامپقا ەسكەرتۋ جاسادى

اقش تاليبانمەن كەلىسسوزدەردى توقتاتتى. اقش پرەزيدەنتىنىڭ بۇنداي شەشىمىنە تالىپتەردىڭ لاڭكەستىك شابۋىلدارىن توقتاتپاۋ ارەكەتى سەبەپ بولدى دەپ كورسەتتى اقش مەملەكەتتىك حاتشىسى جەكسەنبى كۇنى جاساعان مالىمدەمەسىندە.

«ءبىز ولاردىڭ ۋادەلەرىن ورىنداي الاتىنىنا كوزىمىزدى جەتكىزۋىمىز كەرەك»، – دەگەن مايك پولمپە CNN-گە بەرگەن سۇحباتىندا. ول سوزىندە ەلدەگى زورلىق-زومبىلىق ارەكەتتەردى توقتاعاندا عانا، پرەزيدەنت ترامپ ولاردى بەيبىت كەلىسسوز «ماراپاتىنا شاقىراتىنىن» ايتقان. اقش مەم. حاتشىسى بەيبىتشىلىك كەلىسسوزدەرىنىڭ قايتا قالپىنا كەلەتىنى تۋرالى ناقتى ۋادە بەرگەن جوق.

مايك پومپەونىڭ مالىمدەۋىنشە، پرەزيدەنت ترامپتىڭ اۋعانستان پرەزيدەنتى عاني جانە تاليبان جەتەكشىلەرىمەن جەكسەنبىدە ۋاشينگتون جانىنداعى كەمپ-دەۆيدتە كەلىسسوز وتكىزۋدى جوسپارلاپ كەلگەن. ءارى، كەلىسسوزدىڭ سەنىمگە نەگىزدەلەتىنىن، «اقش-تىڭ ۇلتتىق مۇددەلەرىن العا تارتا وتىرىپ»، اۋعانستانداعى 18 جىلدىق سوعىسقا نۇكتە قويۋ نيەتىندە ەكەنىن ايتقان.

اقش مەملەكەتتىك حاتشىسى تالىپتەرمەن كەلىسسوز تۋرالى پوزيتسياسىن ءبىلدىردى. فوتو: CNN.

اقش پەن تاليبان اراسىندا ءبىر جىلعا جۋىق ۋاقىت بەيبىتشىلىك كەلىسسوزدەرى ءجۇرىلدى. اۋعانستانداعى اقش-تىڭ ارنايى وكىلى حاليزاد وتكەن اپتادا تاراپتاردىڭ نەگىزگى ۇستانىمدار تۋرالى پىكىر بىرلىگىنە كەلگەنىن مالىمدەدى. ياعني، اقش پرەزيدەنتى كەلىسىم جوباسىن ماقۇلداسا، اۋعان جەرىندەگى اقش-تىڭ 5000 جاۋىنگەرى 135 كۇن ىشىندە 5 اسكەري بازادان شىعارىلاتىن بولادى.

مايك پومپەونىڭ مالىمدەۋىنشە، اۋعانستانداعى ارنايى وكىلگە ەلگە قايتۋ بۇيرىعى بەرىلگەن. ترامپ اقش-تىڭ اۋعانستانداعى اسكەري ارەكەتتەرىن توقتاتۋ تۋرالى ۋادەسىن بەرگەنىمەن، مەملەكەتتىك حاتشى پومپەو اقش-تىڭ «تەرروريزمنىڭ الدىن الۋ» ماقساتىنداعى «ەگەر دۇرىس بولماسا، ءبىز كەتپەيمىز» دەگەن ۇستانىمىن دا اڭعارتتى.

«ەگەر تالىپتەر ءالى دە مەنمەندىك تانىتسا، بىرنەشە اپتا بويى بەرگەن ۋادەلەرىن ورىنداماسا، وندا پرەزيدەنت قىسىمدى جەڭىلدەتپەيدى. ءبىز دە اۋعانستان قاۋىپسىزدىك كۇشتەرىنە قولداۋدى ازايتپايتىن بولامىز»، – دەگەن اقش مەملەكەتتىك حاتشىسى.

ال، تاليبان تارابى اقش-تىڭ بۇل شەشىمىنە قارسى وزدەرىنىڭ پوزيتسياسىن ءبىلدىرىپ ۇلگەردى. تاليبان مالىمدەمەسىندە: «ترامپ كەمپ-دەۆيد كەلىسسوزدەرىن كەنەتتەن توقتاتقاندىقتان، اقش-تىڭ اۋعانستانداعى اسكەري كۇشتەرى «باسقالارعا قاراعاندا ۇلكەن شىعىندارعا ۇشىرايتىن بولادى»، – دەپ ەسكەرتتى. بۇعان قوسا: «امەريكا قۇراما شتاتتارىنىڭ بەدەلىنە نۇقسان كەلەتىن بولادى. ولاردىڭ بەيبىتشىلىككە قارسى ۇستانىمى الەمگە ءتىپتى دە كوبىرەك بەلگىلى بولادى، ولاردىڭ ادام جانە ەكونوميكالىق شىعىندارى ودان سايىن ارتىپ، اقش-تىڭ حالىقارالىق ساياساتتاعى ءرولى تۋرالى كۇمان كۇشەيە تۇسەدى»، – دەگەن ەسكەرتۋىن جاسادى.

“The Qazaq Times”