گونكونگ تۇرعىندارى كەزەكتى مارتە ەرەۋىلگە شىعىپ، نارازى توپ پوليتسيامەن قاقتىعىستى.

Politico باسىلىمىنىڭ مالىمەتىنشە، كوزۋەي-بەي اۋدانىندا ءتارتىپ ساقشىلارى شەرۋشىلەردى تاراتۋ ءۇشىن كوزدى جاساۋراتاتىن گاز قولدانعان. ال ۆان چاي اۋدانىندا اكتسيانى ۇيىمداستىرۋشىلار جولعا بوگەتتەر قويىپ، كولىك قوزعالىسى توقتاتىلعان.

گونكونگتەگى جاپپاي نارازىلىق شەرۋلەرى ماۋسىمدا باستالعان. 16 ماۋسىمدا 2 ميلليونعا جۋىق ادام نارازىلىق شەرۋىنە شىققان ەدى. بۇل ەل تاريحىندا بولماعان ماسسالىق نارازىلىق اكتسياسى. وسى سىندى اۋقىمدى نارازىلىق شەرۋى گونكونگتە 1997 جىلدان بەرى بولعان ەمەس. سول تۇستا بريتانيا ۇكىمەتى گونكونگتى قىتاي ۇكىمەتىنىڭ ايرىقشا باسقارۋ تارتىبىنە وتكەرىپ بەرگەن بولاتىن. بۇعان نارازى ءجۇز مىڭداعان ادام كوشەگە شىعىپ، قحر بيلىگىن قابىلداۋعا قارسى نارازىلىق بىلدىرگەن. گونكونگتا جەرگىلىكتى اكىمشىلىك باسشىسى كەرري لام زاڭ جوباسىن كۇن تارتىبىنەن الىپ تاستاۋ تۋرالى شەشىم قابىلدادى، بىراق بۇل ۇكىمەتكە قارسى نارازىلىق تولقىنىن توقتاتپادى.

گونكونگتە اپتا سايىن جالعاسىن تاپقان حالىق شەرۋلەرىن بۇۇ وكىلدەرى، شەتەلدىك اگەنتتىكتەر باقىلاپ وتىر. «بۇۇ گونكونگ اكىمشىلىگى اۋماعىنداعى ەرەۋىلدەرگە الاڭداۋشىلىق ءبىلدىرىپ وتىر. سەبەبى قولدا بار ماتەريالدارعا قاراپ ءتارتىپ ساقشىلارى نارازى حالىقتى تارقاتۋ ءۇشىن حالىقارالىق نورماعا ساي كەلمەيتىن قۇرالداردى قولدانعانىن كوردىك. سونداي-اق، جابىق نىساندا كوز جاساۋراتاتىن گاز شاشقان. بۇل ادام ومىرىنە قاۋىپ توندىرەتىن جاعداي. گونكونگ بيلىگىنەن تۇرعىندارعا قارسى كۇش قولدانباۋدى تالاپ ەتەمىز. پوليتسيا بۇل ارەكەتىمەن ەرەۋىلشىلەردى ودان سايىن ىزالاندىرا تۇسەدى. ماسەلەنى كۇشپەن شەشۋدىڭ قاجەتى جوق»، – دەيدى بۇۇ-نىڭ ادام قۇقىعى بويىنشا وكىلى رۋپەرت كولۆيلل.

"The Qazaq Times"