يران: ەۋروپا ەلدەرى مىندەتتەرىن ورىنداماسا ءبىز ءۇشىنشى قادامدى جاسايمىز

وتكەن سەنبىدە فرانتسيا پرەزيدەنتى ەممانۋەل ماكرون مەن يران پرەزيدەنتى حاسان رۋحاني تەلەفون ارقىلى سويلەسىپ، يادرولىق كەلىسىم، اقش-يران قارىم-قاتىناسى تۋرالى تالقىلاعان.

يراننىڭ رەسمي اقپارات قۇرالدارىنىڭ مالىمدەۋىنشە، سويلەسۋ كەزىندە پرەزيدەنت رۋحاني 2015 جىلعى كەلىسىمگە قول قويعان ەۋروپالىق ەلدەردىڭ ءوز مىندەتتەرىن اتقارۋىن تالاپ ەتكەن. «ەگەر ەۋروپا ەلدەرى ءوز مىندەتىن ورىنداماسا، وندا يران ءۇشىنشى قادامىن جاسايدى»، – دەگەن يران پرەزيدەنتى.

يران پرەزيدەنتىنىڭ ءباسپاسوز قىزمەتى جاساعان مالىمدەمەدە، پرەزيدەنت حاسان رۋحاني فرانتسيا پرەزيدەنتىنىڭ يرانمەن كەلىسىمدى جالعاستىرۋعا جاساپ جاتقان قۇلشىنىستارىن جوعارى باعالاعان. سونداي-اق، «ۇلكەن جەتىلىك» ءسامميتى كەزىندە يران ءسىم باسشىسىن شاقىرۋىن بەيبىتشىلىكتى جانە كەلىسىمدى جاقتاۋشى قادام دەگەن باعاسىن بەرگەن.

سويلەسۋ كەزىندە فرانتسيا پرەزيدەنتى يرانمەن يادرولىق كەلىسىمنىڭ جويىلۋى حالىقارالىق اۋىر ساياسي داعدارىسقا اپارىپ سوعاتىنىن، ونىڭ سالدارى بارلىق تاراپقا دا وڭاي بولمايتىنىن ايتقان. سونداي-اق، تاراپتاردى مۇددەلەردى ورتاقتاستىرا وتىرىپ، ماسەلەنى كەلىسىم جولىمەن شەشۋگە شاقىرعان.

 “The Qazaq Times”