ساۋدا سوعىسىندا اقش ءۇشىن قولايلى كەلىسىم جاساۋدىڭ ورايى كەلدى. بۇنداي مالىمدەمەنى كەشە اياقتالعان "ۇلكەن جەتىلىك" سامميتىندە قۇراما شاتتاردىڭ پرەزيدەنتى ءبىلدىردى.

كەشە مارەسىنە جەتكەن G7 ءسامميتى كەزىندە اقش پرەزيدەنتى دونالد ترامپ ساۋدا سوعىسىنىڭ قاۋىپ-قاتەرىنە بايلانىستى "ۇلكەن جەتىلىك" مۇشەلەرىنىڭ الاڭداۋشىلىعىن بارىنشا سەيىلتۋگە تىرىستى. ءتىپتى، ول بەيجىڭمەن كەلىسسوزگە كەلۋ تۋرالى دا كەيبىر ويلارىن ورتاعا سالدى. ونىڭ ايتۋىنشا، ساۋدا سوعىسى باستالعان 18 ايدان بەرى اقش ءۇشىن ءتيىمدى كەلىسىم جاساسۋدىڭ ورايى ەندى عانا كەلدى.

بىراق، ونىڭ بۇل مالىمدەمەسىنەن ءبىر كۇن بۇرىن قىتاي مەن اقش كەزەكتەسكەن "تاريف شابۋىلىن" جاساعان ەدى. قىتاي وزىنە كىرەتىن 70 ملرد دوللار قۇنىنداعى اقش تاۋارلارىنا 5-10 پايىزدىق تاريف بەلگىلەدى. اقش ءوز كەزەگىندە وعان ەكى ەسە جاۋاپ قايتارىپ، بۇرىنعى 250 ملرد دوللار كولەمىندەگى قىتاي تاۋارلارىنا 25 پايىز سالىقتى 30 پايىزعا دەيىن كوتەرەتىنىن، قازىر 10 پايىزدىق تاريفتەردى 15 پايىزعا دەيىن جەتكىزەتىنىن مالىمدەدى. بۇل اقش پەن قىتاي اراسىنداعى ساۋدا سوعىسىنىڭ ەڭ ءبىر قايشىلىقتى تۇسى رەتىندە باعالانعان بولاتىن.

الايدا، ترامپتىڭ سامميتتەگى مالىمدەمەسىنەن كەيىن، حالىقارالىق ساراپشىلار ونىڭ شەشىمى بەيجىڭدى كەلىسسوزگە كوندىرۋ ءۇشىن جاسالعانىن ايتادى. قىتايدىڭ قارىمتا جاۋابىنا ەسەلەنگەن قىسىم ارقىلى جاۋاپ بەرىپ، اقش-قا ءتيىمدى بولعان ساۋدا شارتىنا كەلتىرۋگە ارەكەت ەتەدى دەپ قارايدى.

“The Qazaq Times”