تۇركىمەنستاندا شەتەلدە وقۋعا جانە جۇمىس ىستەۋگە شىققان ازاماتتار اشعابادتىڭ حالىقارالىق اۋەجايىندا ۇستالىپ جاتىر، دەپ جازادى ورتا ازيا اقپاراتتىق قىزمەتى.

ازاتتىقتىڭ تۇركىمەن قىزمەتى حابارلاعانداي، سوڭعى ايدا ونداعان ازامات شەتەلگە شىعا الماي قالعان. اشعاباد اۋەجايىندا ميگراتسيا قىزمەتكەرلەرى تىيىم سالىنۋ سەبەپتەرىنە رەسمي تۇسىنىكتەمە بەرگەن ەمەس.

تۇركيادا وقىعان، اتى-ءجونىن اتاعىسى كەلمەگەن تۇركىمەنستاندىق جىگىتتىڭ ايتۋىنشا، شىلدە ايىنان بەرى تۇركىمەن بيلىگى ازاماتتاردى وقۋعا جانە جۇمىس ىستەۋگە وڭتۇستىك كيپرگە شىعارماي جاتىر.

"ازاماتتاردىڭ كوبىنىڭ ەڭبەك جانە ستۋدەنتتىك ۆيزاسى بار ەكەنىنە قاراماستان اشعابادتان شىعارماي جاتىر. مەنىڭ دە جيەنىم شەتەلدە وقيدى. جازعى دەمالىستا ۇيىنە بارعان. ونى دا قازىر ستۋدەنتتىك ۆيزاسىنا قاراماستان، جىبەرمەي جاتىر. ول ەشقانداي زاڭداردى بۇزعان ەمەس", - دەدى تۇرعىنداردىڭ ءبىرى

وسىعان دەيىن تۇركىمەنستاندا ديپلومدارى تانىلمايتىن شەتەلدىك جوعارى وقۋ ورنىنىڭ ءتىزىمىن جاريالاعان.

اشعاباد سىرتقى ميگراتسيا اعىمىنا قارسى كۇرەسۋ ءۇشىن ازاماتتارىن شەتەلدەن قايتارۋ جانە سىرتقا شىعارماۋ بويىنشا ارنايى شارالار جاساپ كەلەدى.

"The Qazaq Times"