تۇركيا بيلىگى ەلدىڭ وڭتۇستىك-شىعىسىنداعى ءۇش قالانىڭ كۇرد مەرلەرىن قىزمەتىنەن الىپ، ورنىنا شتات گۋبەرناتورلارىن تاعايىندادى. ەلدىڭ ىشكى ىستەر مينيسترلىگى ولارعا تەررورلىق ارەكەتتەرمەن اينالىستى دەگەن ايىپ تاققان. 

كۇردتەر ءجيى قونىستانعان تۇركيانىڭ وڭتۇستىك-شىعىسىنداعى قالالاردا ناۋرىزدىڭ سوڭىنداعى سايلاۋدا كۇرد وكىلدەرى جەڭىپ شىققان بولاتىن. انكارا بيلىگى كۇرد ۇلتىنان سايلانعان بۇل جاڭا مەرلەرگە كۇرد قارۋلى توپتارىمەن بايلانىسى بار دەگەن دە ايىپتاردى تاعىپ وتىر. وسىعان ۇقساس ايىپتارمەن تۇركياداعى 29 پروۆينتسيادان 400-دەن استام ادام تۇتقىندالعان. ىشكى ىستەر مينيسترلىگى بۇل ارەكەتتەردى ۇلتتىق قاۋىپسىزدىكتى قامتاماسىز ەتۋ ءۇشىن جاساپ جاتقاندارىن العا تارتۋدا.

تۇركيانىڭ وڭتۇستىك جانە وڭتۇستىك-شىعىس ايماقتارى يراك، ءسۇريا جەرىندەگى كۇردتەر قونىستانعان ايماقتارعا شەكتەسەدى. كوپتەگەن جىلداردان بەرى ورتا شىعىستاعى كۇردتەر دەربەستىك ءۇشىن كۇرەسىپ جاتقانى بەلگىلى. كۇرد تاۋەلسىزدىگىن ماقسات ەتكەن بىرقاتار ۇيىمدارى دا بار. ولاردىڭ باسىم كوبى انكارا بيلىگى تارابىنان تەررورلىق ۇيىم دەپ تانىلعان. ەل ىشىندەگى كۇرد كۇشتەرى مەن سىرتقى كۇرد قارۋلى توپتارىنىڭ بايلانىسىن ءۇزۋ ءۇشىن تۇركيا ءسۇريا مەن يراكتاعى ءىرى ويىندارعا دا ارالاسىپ كەلەدى.

“The Qazaq Times”