جۇما كۇنى سولتۇستىك كورەيا تاعى ەكى زىمىران سىناعىن وتكىزگەن. فوتو: VOA/Yonhap

وڭتۇستىك كورەيانىڭ قورعانىس كۇشتەرىنىڭ حابارلاۋىنشا، سولتۇستىك كورەيا ءوزىنىڭ شىعىس تەڭىز جاعالاۋىندا جاڭا زىمىران سىناعىن وتكىزگەن. بۇل اقش پەن وڭتۇستىك كورەيا اراسىندا جالعاسىپ جاتقان اسكەري وقۋ-جاتتىعۋعا بەرگەن جاۋابى قاتارىندا باعالانىپ وتىر. 

سەۋلدىڭ مالىمدەۋىنشە، سولتۇستىك كورەيا جۇما كۇنى تەڭىز جاعالاۋىندا ەكى زىمىران ۇشىرعان. اتالعان مالىمدەمەدە زىمىران سىناعى تۋرالى اشالاپ ايتپاعان. الايدا، وڭتۇستىك كورەيا قورعانىس كۇشتەرى زىمىران شابۋىلدارىنان ساقتانۋ شارالارىن جاساي باستاعان. وسىمەن سولتۇستىك كورەيا قىسقا عانا 3 اپتا ىشىندە 6 زىمىران سىناعىن وتكىزىپ ۇلگەردى.

كحدر-نىڭ وڭتۇستىك كورەياعا قاراتا ۇركىتۋ-قورقىتۋ مالىمدەمەلەرىمەن قاتار، ارت-ارتىنان زىمىران سىناقتارىن وتكىزۋى ەكى كورەيا اراسىندا ديالوگتىڭ قايتالاي الىستاي تۇسكەنىن، پيوڭياڭنىڭ (پحەنيان) سەۋل نەمەسە ۋاشينگتونمەن كەلىسسوزدەن باس تارتقانىن بىلدىرەدى.

سولتۇستىك كورەيانىڭ كەشە قانداي زىمىران ۇشىرعانى تۋرالى انىق دەرەك جوق. بىراق، جاقىندا وتكىزگەن سىناقتارىندا كحدر قىسقا قاشىقتىققا ارنالعان بالليستيكالىق زىمىرانداردى ۇشىرعان ەدى. بۇل زىمىراندار اقش پەن وڭتۇستىك كورەيانىڭ زىمىرانعا قارسى جۇيەسىن ورنالاستىرۋعا قارسى جاساعان ارەكەتى دەپ باعالانعان بولاتىن.

بۇۇ قاۋىپسىزدىك كەڭەسى سولتۇستىك كورەيانىڭ ءار قانداي بالليستيكالىق زىمىراندى ۇشىرۋىنا تىيىم سالعان بولاتىن. بىراق، اقش پرەزيدەنتى دونالد ترامپ سولتۇستىك كورەيانىڭ زىمىران سىناقتارى قۇراما شتاتتار ءۇشىن ەش قاۋىپسىز ەكەنىن ايتىپ كەلەدى. ونىڭ ايتۋىنشا سولتۇستىك كورەيانىڭ ەشبىر زىمىرانى اقش تەرريتورياسىنا جەتە المايدى.

ال، وتكەن اپتادا ترامپ سولتۇستىك كورەيانىڭ زىمىران سىناقتارى تۋرالى جاساعان مالىمدەمەسىندە، بۇل ارەكەتتەرگە "كىشى-كىرىم كەشىرىممەن قارايتىنىن", اقش-وڭتۇستىك كورەيا اراسىنداعى اسكەري وقۋ-جاتتىعۋلار اياقتالىسىمەن سولتۇستىك كورەيانىڭ دا زىمىران سىناعى توقتايتىنىن بولجاعان. مالىمەتتەرگە سايكەس، ەكى ەلدىڭ اسكەري جاتتىعۋى ەندى 4 كۇننەن كەيىن ءوز مارەسىنە جەتەدى.

پيوڭياڭ كوپ ۋاقىتتان بەرى اقش پەن وڭتۇستىك كورەيانىڭ بىرلەسكەن اسكەري جاتتىعۋلارىن اگرەسسيۆتى سيپاتى بار دەپ شاعىم ايتىپ كەلگەن. الايدا، ۋاشينگتون مەن سەۋلدىڭ قورعانىس وكىلدەرى بۇل جاتتىعۋلاردى قورعانىس سيپاتىنداعى ءداستۇرلى جاتتىعۋلار رەتىندە كورسەتەدى. سولتۇستىك كورەيا ءبىر كۇن بۇرىن رەسمي اقپارات قۇرالدارى ارقىلى اقش پەن وڭتۇستىك كورەيانىڭ كەيبىر اسكەري ارەكەتتەرى "جاڭا سۋىق سوعىسقا" ۇرىندىرادى، وڭىردە قارۋ-جاراق باسەكەسىن تۋدىرادى دەپ ەسكەرتكەن بولاتىن.

“The Qazaq Times”