ترامپ: جوعارى تاريفتەردەن ءبىز پايدا تاۋىپ وتىرمىز، قىتاي قيىن جاعدايدا

اقش پرەزيدەنتى دونالد ترامپ جەكسەنبى كۇنى جاساعان مالىمدەمەسىندە قىتاي تاۋارلارىنا سالعان جوعارى تاريفتەردەن قۇراما شتاتتاردىڭ پايدا تاۋىپ وتىرعانىن ايتتى. سونداي-اق، وسى اپتادا اقش ساۋدا وكىلى مەن قارجى ءمينيسترى قىتاي كەلىسسوز دەلەگاتسياسىمەن كەزدەسەتىنىن جەتكىزدى.

«جوعارى تاريفتەردەن كەيىنگى ءبىزدىڭ جاعدايمىز وتە جاقسى. قىتايعا سالىنعان جوعارى تاريفتەردەن ءبىز ميللياردتاعان دوللار جيناي الدىق»، – دەگەن پرەزيدەنت ترامپ. ول جانە وباما تۇسىندا قىتاي ۇكىمەتى كوپ باسىمدىقپەن پايدا تۇسىرگەنىن، بۇنداي جاعداي بۋش ۇكىمەتى مەن وزگە اقش ۇكىمەتتەرى كەزىندە دە جالعاسقانىن ايتقان.

ترامپ سوزىندە: «قىتاي قازىردىڭ وزىندە قيىن كۇيدە،  مىڭداعان كومپانيالار قىتايدى تاستاپ قۇراما شتاتتاردى قامتىعان باسقا ەلدەرگە كەتىپ جاتىر. سەبەبى، ولار اۋىر كەدەن باجىسىن تولەگىسى كەلمەيدى. تاعى ءبىر جاعىنان، قىتاي كوپ مولشەردەگى كەدەن سالىعىن تولەۋگە ءماجبۇر بولىپ وتىر. ولار وزدەرىنىڭ ۆاليۋتا قۇنىن ارزانداتادى جانە كومپانيالارى ءۇشىن كەدەن سالىعىن تولەۋگە مۇددەلى. ال، ءبىزدىڭ ازاماتتارىمىز كەدەن سالىعىن  تولەپ وتىرعان جوق»، – دەگەن.

اقش پرەزيدەنتىنىڭ مالىمدەمەسىنەن بەلگىلى بولعانداي، وساكاداعى سامميتتەن كەيىن اقش پەن قىتاي اراسىندا كەلىسسوزدەر قايتا جالعاسادى. وسى اپتادا اقش ساۋدا وكىلى مەن قارجى ءمينيسترى قىتايلىق لاۋازىمدىلارمەن كەزدەسەدى. ەكى ەل اراسىندا ساۋدا كەلىسىمىنە بايلانىستى كەلىسسوزدەر ءالى دە كوپ ۋاقىتقا جالعاسۋى مۇمكىن.

“The Qazaq Times”