يران ءسىم: بريتانيانىڭ يران مۇناي تانكەرىن ۇستاۋى – قاراقشىلىق ارەكەت

بريتانيانىڭ تەڭىز اسكەري كۇشتەرى گيبرالتار جاعالاۋىندا يران مۇناي تانكەرىن تۇتقىنداعان. رەسمي مالىمدەمەدە ايتىلۋىنشا، يران مۇناي تانكەرى 2011 جىلى سۇرياعا قارسى ەنگىزگەن سانكتسيانى بۇزعان. الايدا، تەھران بۇل ايىپتاۋدى جوققا شىعاردى.

يران سىرتقى ىستەر ءمينيسترى مۇحاممەد جاۆاد زاريف بريتانيا تەڭىز كۇشتەرىنىڭ بۇل ارەكەتىن «تەڭىز قاراقشىلىعى» دەپ باعالاعان. يران ءسىم تارابى ەلدەگى بريتانيا ەلشىسىن وسى ماسەلە بويىنشا ارنايى تۇسىنىك بەرۋىن تالاپ ەتكەن. سىرتقى ىستەر مينيسترلىگىنىڭ رەسمي وكىلى جاساعان مالىمدەمەدە: «يران تانكەرىنىڭ ۇستالۋى – زاڭسىز ءارى قايشىلىق تۋدىرۋشى قاتەرلى ارەكەت»، – دەپ ەسكەرتكەن.

يران ۇكىمەتى بريتانيانى اقش-تىڭ تالابى بويىنشا مۇناي تانكەرىن ۇستاپ وتىر دەپ قارايدى. مۇناي تولتىرىلعان تانكەر حالىقارالىق سۋ جولدارىنىڭ ەرەجەسىنە ساي ءارى دۇرىس باعىتتا كەتىپ بارا جاتقانىن العا تارتادى.

يراننىڭ IRNA اقپارات اگەنتتىگىندەگى حاباردا بۇل تۋرالى: «بريتانيا تەڭىز كۇشتەرىنىڭ يراندىق مۇناي تانكەرىن ۇستاۋى جانە لوندون بيلىگىنىڭ بۇل تەڭىز قاراقشىلىق ارەكەتىن قولداۋى، شىن مانىسىندە، ەۋروپانىڭ اقش الدىنداعى السىزدىگى، ءارى تاۋەلسىز شەشىم قابىلداي المايتىندىعىن كورسەتتى»، – دەپ جازعان.

“The Qazaq Times”