ترامپ سولتۇستىك كورەيا شەكاراسىندا. فوتو: Fars News.

وڭتۇستىك جانە سولتۇستىك كورەيا اراسىنداعى بەيبىت شەكارا ايماعى سانالاتىن پانمىنجومدا اقش پرەزيدەنتى مەن سولتۇستىك كورەيانىڭ ەڭ جوعارى باسشىسى ءۇشىنشى رەت كەزدەستى. بۇل كەزدەسۋ جاپونياداعى "ۇلكەن جيىرمالىق" سامميتىنەن كەيىن ءوتۋى الەم ەلدەرىنىڭ نازارىن اۋداردى. 

پرەزيدەنت ترامپ پەن كحدر باسشىسى كيم جوڭ ۋن اراسىنداعى كەزەكتى كەزدەسۋى دە تاريحي دەپ باعالانۋدا. سەبەبى، بۇل رەتكى باس قوسۋ وڭتۇستىك جانە سولتۇستىك كورەيا اراسىنداعى سيمۆولدىق شەكارا ايماعىندا ءوتىپ وتىر. سونىمەن بىرگە، پرەزيدەنت ترامپ شەكارا سىزىعىنان سولتۇستىك كورەياعا قاراي ءوتىپ، كحدر باسشىسىمەن بىرگە شەكارا سىزىعىن اتتاعان.

بۇنىمەن اقش پرەزيدەنتى دونالد ترامپ سولتۇستىك كورەيا تەرريتورياسىنا تابانى تيگەن العاشقى اقش پرەزيدەنتى رەتىندە تاريحتا قالدى دەۋگە دە بولادى.

اقش پرەزيدەنتى كەزدەسۋدى ەكى ەل قارىم-قاتىناسى ءۇشىن اسا ماڭىزدى دەپ باعالادى. دەگەنمەن، كەزدەسۋدەن كەيىنگى مالىمدەمەسىندە سولتۇستىك كورەياعا باعىتتالعان سانكتسيالاردىڭ ساقتالاتىنىن جەتكىزگەن.

“The Qazaq Times”