اقش بارلاۋ قىزمەتى رەسەي، قىتاي جانە يران ەلدەرى اقش جۇيەسىن وزگەرتۋگە ارەكەت ەتىپ جاتقانىن ايتۋدا. فوتو: Newsweek.

رەسەي، قىتاي جانە يران ەلدەرى اقش-تاعى قوعامدىق پىكىردى وزگەرتۋگە جانە 2020 جىلعى پرەزيدەنت سايلاۋىنا ارالاسۋعا ارەكەت ەتىپ وتىر. مۇنداي اقپاراتتى امەريكالىق باسىلىمدار ترامپ ۇكىمەتىنىڭ رەسمي وكىلى جاساعان مالىمدەمەگە سىلتەمە جاساي وتىرىپ تاراتتى.

Bloomberg News حابارىندا قىتاي بۇل ماقساتتا ءداستۇرلى باق-تى بەلگىلى ءبىر ساياساتتى ناسيحاتتاۋعا ىنتالاندىرسا، رەسەي مەن يران الەۋمەتتىك جەلىلەردى بارىنشا پايدالانىپ جاتقانىن ايتقان. ال، امەريكالىق بارلاۋ قىزمەتىنىڭ لاۋازىمدىلارى Washington Free Beacon-گە بەرگەن مالىمەتىندە، 2020 جىلعى سايلاۋدا قۇراما شتاتتىڭ جالپىۇلتتىق سايلاۋ جۇيەسىنىڭ شابۋىلعا ۇشىراۋىنا قارسى شارالاردى جاساۋدى ۇسىنعان. اسىرەسە، كەيبىر ەلدەردىڭ الەۋمەتتىك جەلىلەر ارقىلى سايلاۋعا ارالاسۋىنا جول بەرمەۋدى قاداعالاۋ كەرەكتىگىن ايتقان.

بۇعان دەيىن امەريكالىق بارلاۋ اگەنتتىكتەرى رەسەيدى 2016 جىلعى پرەزيدەنت سايلاۋى جانە 2018 جىلعى ارالىق سايلاۋعا ارالاستى دەپ ايىپتاپ كەلگەن بولاتىن. اقش-تىڭ بارلاۋ اگەنتتىگىندەگى لاۋازىمدىلاردىڭ ايتۋىنشا، رەسەيدىڭ ەڭ نەگىزگى جوسپارى – امەريكالىقتاردى ۇقساماعان كوزقاراستار ارقىلى ءبىر-بىرىنە قارسى قويۋ، قۇراما شتاتتا پىكىر الاۋىزدىعىن تۋدىرىپ، ساياسي جۇيەنى بۇزۋ. دەگەنمەن، بۇعان دەيىن رەسەيگە باسا ءمان بەرىپ كەلگەن بارلاۋ قىزمەتى، ەندىگى جەردە قىتاي مەن يراننىڭ ارەكەتتەرىندە قاداعالاۋدى بارىنشا كۇشەيتپەك.

قازىرگە، اقش-تىڭ بارلاۋ ۇيىمدارىندا شەتەلدىك كۇشتەردىڭ اقش-تىڭ سايلاۋعا قاتىستى ينفراقۇرىلىمدارىن بۇزعانى تۋرالى ناقتى مالىمەتى جوق. بىراق، شەت كۇشتەردىڭ اقش جۇيەسىنە ارالاسۋىن بولدىرماۋ ءۇشىن مەملەكەتتىك قىزمەتتەردە پايدالانىلاتىن جابدىقتارعا دەيىن جاڭالاپ، كەيبىر جۇمىس تارتىپتەرىنە دە وزگەرىستەر ەنگىزبەك.

 

 “The Qazaq Times”