قازاقستان رەسپۋبليكاسىنىڭ كەزەكتى پرەزيدەنت سايلاۋىنىڭ باستالۋىنا بىرنەشە كۇن عانا قالدى. قازاقستانداعى ساياسي وقيعاعا نازار اۋدارعان شەتەلدىك جانە حالىقارالىق ۇيىمدار مەن باق وكىلدەرىن اككرەديتتەۋ جۇمىستارى ءبىر كۇن بۇرىن اياقتالدى. بۇل پروتسەستى سىرتقى ىستەر مينيسترلىگى مەن ورتالىق سايلاۋ كوميسسياسى بىرلەسە اتقارعان. 

قر ءسىم تارابىنىڭ حابارلاۋىنشا، تۇراقتى نەگىزدە 121 شەتەلدىك باق وكىلىن قامتىعان، 40-تان استام ەلدەن 227 شەتەلدىك كوررەسپوندەنت تىركەلگەن. 2015 جىلعى سايلاۋدا بۇل سان 168 بولعان.  شەتەلدىك جۋرناليستەر قازاقستاننىڭ سىرتقى ساياسي ۆەدومستۆولارىنىڭ بەرگەن تۇراقتى نەمەسە ۋاقىتشا اككرەديتتەۋ تۋرالى كۋالىگى بولعاندا عانا سايلاۋعا باقىلاۋ جاساي الادى.

ءسىم تارابى  "سايلاۋ زاڭىنا" سايكەس، شەت ەلدىڭ جانە حالىقارالىق ۇيىمداردىڭ باقىلاۋشىلارىنا جانە شەتەلدىك باق وكىلدەرىنە اككرەديتتەۋ تۋرالى كۋالىگى بولعان كۇندە دە، سايلاۋدى باقىلاۋ ءۇشىن اۋدارماشىمەن ىلەسىپ ءجۇرۋى كەرەك ەكەنىن ەسكەرتەدى.

سىرتقى ىستەر مينيسترلىگى مەن ورتالىق سايلاۋ كوميسسياسى مالىمدەمەلەرىندە، كەزەكتى سايلاۋدا ەلگە كەلگەن شەتەلدىك جۋرناليستەردىڭ سانى رەكوردتىق كورسەتكىشتە دەپ كورسەتكەن، ءارى بۇنى "الەمنىڭ قازاقستانداعى ساياسي جاعدايعا نازار اۋدارۋى" دەپتى.

“The Qazaq Times”