يران پرەزيدەنتى حاسان رۋحاني كەزەكتى مالىمدەمەسىندە، ەگەر قۇراما شتات تارابى بۇرىنعى كەلىسىمدەگى كەپىلدىكتەرىن قايتا موينىنا العان جاعدايدا تەھران (تەگەران) بيلىگى كەلىسسوزگە دايىن ەكەنىن ايتتى. ول بۇل مالىمدەمەسىن مينيسترلەرمەن كەزدەسۋ وتىرىسىنان كەيىن جاريا ەتكەن.

رۋحاني سوزىندە اقش-تى يرانعا قارسى ماقساتتى تۇردە «جاۋلىق ساياساتىن» جۇرگىزىپ كەلدى جانە ەمبارگولار ارقىلى يران حالقىنا «قاستاندىق جاسادى» دەپ ايىپتاعان. سونداي-اق، پرەزيدەنت رۋحاني سوزىندە: «اقش ءوزىنىڭ ەمبارگولارى ارقىلى ءوزىنىڭ شىنايى بەت-بەينەسىن اشىپ كورسەتتى. ولاردىڭ قۇبىلمالى كوزقاراستارى دا بەلگىلى بولدى»، – دەگەن.

ول جانە يران مەن اقش اراسىنداعى كەلىسسوز ماسەلەلەرى تۋرالى پىكىرىندە: «ءبىز ولاردىڭ سوزدەرىن ەمەس، ارەكەتتەرىنە قارايمىز. يران حالقىنا باعىتتالعان ەمبارگولارىن توقتاتسا جانە كەپىلدىكتەرىن قايتا موينىنا الار بولسا، اۋدارىپ تاستاعان كەلىسوز ۇستەلىن قايتا ورنىنا قويار بولسا، ءبىز كەلىسسوز جۇرگىزۋگە ءازىرمىز»، – دەگەن.

يران پرەزيدەنتى سونىمەن بىرگە، قۇراما شتات تارابى ءوز ۇستانىمىن وزگەرتسە يران قارىم قاتىناستى قايتا-قالپىنا كەلتىرۋگە دايىن ەكەنىن جەتكىزگەن. «بۇرىنعى ساياساتتى جالعاستىرمايتىنىن ءوز ارەكەتتەرىمەن ايگىلەۋى كەرەك»، – دەپ ەسكەرتكەن پرەزيدەنت رۋحاني.

“The Qazaq Times”