سولتۇستىك كورەيا ءوزىنىڭ رەسمي اقپارات اگەنتتىگى ارقىلى مالىمدەمە تاراتىپ، اقش تارابى كورەي تۇبەگى ماسەلەسىندەگى ۇستانىمىن وزگەرتپەسە، يادرولىق كەلىسسوزدىڭ ەشقاشان بولمايتىنىن ايتتى. كحدر-نىڭ يادرولىق كەلىسسوز تۋرالى بۇل جاڭا مالىمدەمەسى اقش پرەزيدەنتى دونالد ترامپتىڭ جاپونياداعى رەسمي ساپارى قارساڭىندا جاسالعان. 

سولتۇستىك كورەيانىڭ سىرتقى ىستەر مينيسترلىگىنىڭ اتالعان مالىمدەمەسىندە، كحدر مەن اقش ليدەرلەرىنىڭ ەكىنشى رەتكى ءسامميتىنىڭ ناتيجەسىز اياقتالۋىنا سولتۇستىك كورەيانىڭ جاۋاپ بەرمەيتىنىن، قۇراما شتات تارابى ءوزىنىڭ ۇستانىمدارىن وزگەرتپەسە، كورەي تۇبەگىنىڭ يادرولىق قارۋسىزدانۋى تۋرالى كەلىسسوزدەر قايتا باستالمايتىنىن بىلدىرگەن.

ترامپ بيلىككە شىققاننان كەيىن اقش پەن سولتۇستىك كورەيا اراسىندا ءبىر مەزگىل يادرولىق سوعىس قاۋپى ارتىپ، وڭىردەگى ەلدەردى قاتتى الاڭداتقان ەدى. بىلتىر  جىل باسىندا كحدر باسشىسى كيم جوڭ ۋن (كيم چەن ىن) مالىمدەمە جاساپ، "يادرولىق قوبديشانى كەلىسسوز ۇستەلىنە الىپ شىعاتىنىن", "كحدر رەجيمىنىڭ ساقتالۋىنا كەپىلدىك بەرىلگەن كەلىسسوزدەرگە دايىن ەكەنىن" جەتكىزدى. سودان باستاپ اقش پەن سولتۇستىك كورەيا اراسىندا كەلىسسوزدەر جانداندى.

بيىل اقپان ايىنىڭ سوڭىندا ەكى ەل باسشىسى ەكىنشى رەتكى ءسامميتىن ۆەتنام استاناسىندا وتكىزدى. الايدا بۇل كەلىسسوز ناتيجەسىز اياقتالىپ، قوس تاراپ كەلىسىمگە كەلە المادى. سەبەبى، تاراپتار ءبىر-ءبىرىنىڭ تالاپتارىنا كەلىسپەگەن. اقش سولتۇستىك كورەيانىڭ تولىقتاي يادرولىق قارۋسىزدانۋىن تالاپ ەتكەن. ال، سولتۇستىك كورەيا يادرولىق قارۋدان باس تارتۋدان بۇرىن ەكونوميكالىق سانكتسيالاردىڭ الىنىپ تاستالۋىن سۇراعان.

“The Qazaq Times”