حۋسيت جاساقتارى. فوتو: مەجدۋنارودنايا جيزن.

يەمەندەگى حۋسيت كۇشتەرى ساۋد ارابياسى مەن بىرىككەن اراب امىرلىكتەرىنە تيەسىلى 300-گە جۋىق نىسانعا شابۋىل جاسايتىندارىن مالىمدەدى. حۋسيت قارۋلى كۇشتەرىنىڭ شابۋىل نىساناسىندا يەمەن جەرىندەگى اسكەري بازالارمەن قاتار ساۋد ارابياسى مەن ءباا-نىڭ ءوز تەرريتوريالارى دا بار.

حۋسيت كۇشتەرى تاراتقان مالىمەتتە 14 مامىرداعى ساۋد ارابياسىنىڭ مۇناي ستانساسىنا جاسالعان شابۋىل جوسپارلانعان قارۋلى وپەراتسيالاردىڭ ءبىر عانا بولەگى ەكەنىن اتاپ كورسەتكەن. بۇل وپەراتسيالار جوسپارى ناۋرىز ايىنان باستاپ ىسكە اسىرۋ كوزدەلگەن. جوسپار تىزىمىندە اتالعان ەكى ەلگە باعىتتالعان 300 قارۋلى وپەراتسيا بار.

بۇعان قارسى ساۋد ارابياسى دا وزدەرىنە باعىتتالعان شابۋىلداردىڭ جاۋاپسىز قالمايتىنىن ەسكەرتتى. ساۋد اۋلەتىنىڭ تاعىنداعى كورول سالمان ءاس-ساۋد ءبىر كۇن بۇرىن شىعاناق ەلدەرى ىنتىماقتاستىق كەڭەسى مەن اراب ەلدەرى وداعىنىڭ ليدەرلەرىن شۇعىل تۇردە كەڭەسكە شاقىردى. 30 مامىردا وتەتىن كەڭەستە وڭىرلىك قاۋىپسىزدىك باستى تاقىرىپ ەتىلەدى.

ساۋد ارابياسى، ءباا جانە اقش قاتارلى ەلدەر يراندى يەمەندەگى حۋسيت كۇشتەرىن قولداپ ەلدەگى سوعىس ءورتىن كۇشەيتتى دەپ ايىپتاپ كەلگەن. اقش تارابى يرانعا قاراتقان ەسكەرتۋىندە ير قارۋلى كۇشتەرىنەن تىس ولار قولدايتىن قارۋلى توپتاردىڭ دا كەزكەلگەن شابۋىلىن تەھراننىڭ ارەكەتى رەتىندە قابىلدايتىنىن ايتقان.

“The Qazaq Times”