يرانعا قارسى ەكونوميكالىق قىسىمنىڭ سوڭعى سول ەلدەگى ەكونوميكالىق داعدارىسقا الىپ كەلدى. شاراسىز قالعان يران رەجيمى قانداي دا ءبىر قارسىلىق ارەكەتتەرگە بارۋى مۇمكىن. ءتىپتى قارۋلى قاقتىعىستىڭ دا مۇمكىندىگى بارعان سايىن ارتىپ كەلەدى. بۇل كورشىلەس ايماقتار مەن الەم ەلدەرىن الاڭداتۋدا.

ال، اقش پرەزيدەنتى دونالد ترامپ يران اقش-تىڭ وڭىردەگى مۇددەسىنە قارسى قارۋلى ارەكەتتەرگە باراتىن بولسا ونىڭ سالدارى يران ءۇشىن اسا اۋىر بولاتىنىن ەسكەرتتى. بۇنداي مالىمدەمەنى ول ۆەنگريا پرەمەر-ءمينيسترى ۆيكتور ورباندى قابىلداۋ كەزىندە ورتاعا سالدى.

«يرانمەن اراداعى قايشىلىقتىڭ قالاي شەشىم تاباتىنىن ۋاقىت كورسەتەدى. ەگەر، قۇراما شتاتتارعا قارسى ارەكەتتەرگە باراتىن بولسا بۇنىڭ سالدارى يران ءۇشىن اسا اۋىر بولادى. ءبىز قاتاڭ جاۋاپ قايتارامىز»، – دەگەن پرەزيدەنت ترامپ.

يران مۇناي ەكسپورتىنىڭ شەكتەۋگە ۇشىراۋى ەل ەكونوميكاسىن اۋىر دارەجەدە تۇرالاتتى. داعدارىس جالعاسا تۇسسە، بۇل يران رەجيمى مەن حالقى ءۇشىن ۇلكەن قيىندىق الىپ كەلمەك. ير رەجيمى بۇل سىناققا قارسى تۇرۋعا قاۋقارلى ەكەنىن ايتۋدا.

الايدا، ەلدەگى ساياسي قارسىلىقتار دا كۇشەيە تۇسكەن. قارۋلى كۇشتەر جاساعان مالىمدەمەدە، قاجەت بولسا پارسى شىعاناعىنداعى اقش كەمەلەرىنە اۋە شابۋىلىن جاساۋعا دايىن ەكەندەرىن دە ايتتى. بۇل ورتا-شىعىستاعى تۇراقتىلىق پەن قاۋىپسىزدىككە ۇلكەن قاتەر ءتونىپ كەلە جاتقانىن اڭعارتادى.

“The Qazaq Times”