تۇرعىندار زەينەتاقى قىزمەتتەرىن «قازپوشتا» بولىمشەلەرىنەن الا الادى

«بجزق» اق پەن «قازپوشتا» اق ەلدىڭ شالعاي ەلدىمەكەندەرىن زەينەتاقى قىزمەتتەرىمەن قامتۋ ماقساتىندا قوردىڭ سالىمشىلارى مەن الۋشىلارىنا «قازپوشتا» اق بولىمشەلەرىندە قىزمەت كورسەتۋ بويىنشا بىرلەسكەن جوبانى ىسكە قوستى.

ەسكە سالا كەتەلىك، 2018 جىلى زەينەتاقى قىزمەتتەرىن ەلدىڭ شالعاي اۋداندارىنداعى پوشتا بولىمشەلەرى ارقىلى كورسەتۋ تۋرالى «بجزق» اق پەن «قازپوشتا» اق اراسىندا مەموراندۋمعا جانە اگەنتتىك كەلىسىمگە قول قويىلعان بولاتىن.

قازىر «قازپوشتا» اق وپەراتورلارى ارنايى وقىتۋ كۋرسىنان وتكەن سوڭ،  «بجزق» اق-تىڭ قىزمەت كورسەتۋ ورتالىقتارى جوق ەلدىمەكەندەردە زەينەتاقى قىزمەتتەرى كورسەتىلە باستادى. وسىلايشا ەكونوميكالىق تۇرعىدان بەلسەندى حالقىنىڭ سانى 2 مىڭنان اساتىن 94 ەلدىمەكەننىڭ تۇرعىندارى زەينەتاقى قىزمەتتەرىن ۇلتتىق پوشتا بايلانىسى وپەراتورى ارقىلى الۋعا قول جەتكىزدى. بۇل رەتتە زەينەتاقى قىزمەتتەرى ۇلتتىق پوشتا جەلىسى ارقىلى اقتوبە، الماتى، اتىراۋ، باتىس قازاقستان، جامبىل، قاراعاندى، قىزىلوردا، قوستاناي، ماڭعىستاۋ، سولتۇستىك قازاقستان، تۇركىستان جانە شىعىس قازاقستان وبلىستارىنىڭ ەلدىمەكەندەرىندە كورسەتىلەدى.

اتاپ ايتساق، بۇل اۋىلدار مەن كەنتتەردىڭ تۇرعىندارى قازپوشتا بولىمشەلەرىندە مىناداي قىزمەتتەردى الادى:

• سالىمشىنىڭ (الۋشىنىڭ) قوسىمشا دەرەكتەمەلەرىن (جەكە كۋالىگىنىڭ ءنومىرى، تەلەفون ءنومىرى، ەلەكتروندىق جانە پوشتالىق مەكەنجايى) وزگەرتۋ/تولىقتىرۋ تۋرالى ءوتىنىش بەرۋ;
• حابارلاۋ ءتاسىلىن وزگەرتۋ (بەلگىلەۋ) (ونىڭ ىشىندە «بجزق» اق ەلەكتروندىق فورماتتاعى قىزمەتتەرىنە قول جەتكىزۋ) تۋرالى كەلىسىمگە قول قويۋ.

"The Qazaq Times"