سولتۇستىك كورەيا پومپەونىڭ كەلىسسوزگە قاتىسپاۋىن تالاپ ەتتى

«كەلىسسوزگە مايك پومپەو قاتىسپاسىن». بۇنداي مالىمدەمەنى سولتۇستىك كورەيانىڭ سىرتقى ىستەر مينيسترلىگى جاسادى. كحدر تارابى يادرولىق قارۋدان باس تارتۋ تۋرالى كەلىسسوزدەرگە اقش مەملەكەتتىك حىتشىسى مايك پومپەونىڭ قاتىسۋىن قالامايدى. مالىمدەمەدە، پومپەونىڭ كەلىسسوزدەردە «شەكتەن تىس تالاپتار قويىپ»، «اقىلسىز» مامىلە جاسايتىنىن ايتقان.

پومپەو سولتۇستىك كورەياعا نە ءۇشىن ۇناماي قالدى؟

مايك پومپەو پرەزيدەنت ترامپتىڭ سەنىمدى سەرىگىنىڭ ءبىرى، ءارى سىرتقى ساياساتتا تىسقاققان  ساياساتكەر. بۇرىن ورتالىق بارلاۋ اگەنتتىگىن (CIA) دە باسقارعان، تيللەرسون مەن ترامپتىڭ اراسى بۇلىنگەننەن كەيىن اقش مەملەكەتتىك حاتشىسى لاۋازىمىنا كەلگەن. ول جانە ۇزاق جىلداردان كەيىن سولتۇستىك كورەياعا رەسمي ساپار جاساعان العاشقى امەريكالىق لاۋازىم رەتىندە دە بەلگىلى. بىرنەشە مارتە پيوڭياڭدا بولىپ، ترامپتان بۇرىن  كيم جوڭ ۋنمەن دە كەزدەسكەن.

وسىدان ءبىر اپتا بۇرىن سەناتتاعى كوميتەت وكىلدەرى اقش مەملەكەتتىك حاتشىسىنا سۇراۋ جولداپ، كحدر ەڭ جوعارى باسشىسى كيم جوڭ ۋندى «تيران» دەپ اتاۋعا بولاتىن، بولمايتىنىن سۇراعان. پومپەو بۇعان بەرگەن جاۋابىندا: «البەتتە، مەن بۇعان دەيىن دە ونى «تيران» دەپ اتاپ كەلگەم»، – دەگەن ەدى. پيوڭياڭ لاۋازىمدىلارى پومپەونىڭ بۇل سوزىنە كوبىرەك شۇيلىكتى.  وعان قوسا، اقش مەملەكەتتىك حاتشىسىن ۆەتنامداعى كەلىسسوزگە كەدەرگى كەلتىردى دەپ سىنعا العان.

سولتۇستىك كورەيا ءسىم تارابىنىڭ مالىمدەمەسىندە: «اقش-پەن كەلىسسوزدەر جالعاساتىن بولسا، ديالوگقا مايك پومپەو مىرزا ەمەس، ادەپتى مامىلە جاسايتىن جانە كوممۋنيكاتسيا جاعىنان جەتىلگەن ادامنىڭ دايىندالعانى دۇرىس دەپ سانايمىز»، – دەلىنگەن.

ايتا كەتەيىك، وسىدان ءبىر كۇن بۇرىن سولتۇستىك كورەيا «قۋاتتى وقتۇمسىق ورناتىلعان، الىستان باسقارىلاتىن تاكتيكالىق قارۋدى» ءساتتى سىناعانىن جاريالاعان بولاتىن. بۇل پيوڭياڭنىڭ ەكىنشى ترامپ-كيم سامميتىنەن كەيىنگى العاش رەت زىمىران سىناعىن وتكىزۋى. سونداي-اق، سىناق اقش-وڭتۇستىك كورەيا اراسىنداعى بىرىككەن اسكەري وقۋ-جاتتىعۋدان كەيىن جاسالعان،  ال، بۇگىن كحدر اقش-قا مايك پومپەو قاتىساتىن كەلىسسوزدەر ناتيجەسىز اياقتالاتىنىن ەسكەرتىپ وتىر.

“The Qazaq Times”