11 ءساۋىر كۇنى اقش پرەزيدەنتى دونالد ترامپ پەن وڭتۇستىك كورەيا پرەزيدەنتى ءمۇن جاين اق ۇيدە كەزدەسىپ، قۇراما شتاتتار مەن سولتۇستىك كورەيا اراسىنداعى يادرولىق كەلىسسوز جانە ديپلوماتيانى قالاي قالپىنا كەلتىرۋ ماسەلەسىن تالقىلادى. بۇل تۋرالى  VOA جاڭالىقتار قىزمەتى حابارلاعان بولاتىن.

بۇعان دەيىن اقش پرەزيدەنتى سولتۇستىك كورەيا باسشىسى كيم جوڭ ۋنمەن ەكى مارتە كەلىسسوز كەزدەسۋىن وتكىزگەن بولاتىن. بيىل اقپان ايىندا وتكەن ەكىنشى رەتكى سامميت جوسپارلانعان ۋاقىتتان ەرتەرەك اياقتالدى، ءارى تاراپتار ەشقانداي كەلىسىمگە قول جەتكىزە المادى. سەبەبى، سولتۇستىك كورەيا تارابى وزدەرىنە باعىتتالعان سانكتسيالاردى الىپ تاستاۋدى تالاپ ەتسە، قۇراما شتات دەلەگاتسياسى كحدر-عا يادرولىق قارۋىنان باس تارتۋ تالابىن قويعان.  

ءمۇن جاين بۇعان دەيىن دە كورەي تۇبەگىن يادرولىق قارۋسىزداندىرۋ ءىسىن بىرتىندەپ جۇزەگە اسىرۋ، ول ءۇشىن اقش-سولتۇستىك كورەيا ديالوگىن دامىتۋ، ءتىپتى كەيبىر سانكتسيالىق قىسىمداردى جەڭىلدەتۋ جوباسىن قولداپ كەلگەن. شىن مانىسىندە، بۇل وڭتۇستىك كورەيا پرەزيدەنتىنىڭ الدىندا تۇرعان ەڭ ۇلكەن ديپلوماتيالىق ماسەلە. ياعني، قازىرگى كەزدە اقش-كحدر اراسىندا كەلىسسوز داعدارىستارى مەن قيىندىقتارى كۇشەيە تۇسكەن كەزەڭ.

اقش-تىڭ CNN ارناسى بۇل تۋرالى ساراپتاۋىندا، سولتۇستىك كورەيا باسشىسى قازىر ءار ءتۇرلى مۇمكىندىكتەردى سالماقتاپ قاراپ، ءوزىنىڭ ىقپالىن قالپىنا كەلتىرەتىن جولداردى قاراستىرىپ جاتىر دەگەن بولجامدى ايتادى. ايتالىق، سپۋتنيكتەردى ىسكە قوسۋ، ءتۇرلى ارانداتۋ ارەكەتتەر ارقىلى قۇراما شتاتتارمەن شيەلەنىستى كۇشەيتۋ ارقىلى ءوز ىقپالىن ارتتىرعىسى كەلەدى دەپ قارايدى.

جاقىندا سولتۇستىك كورەيانىڭ رەسمي اقپارات اگەنتتىگى كيم جوڭ ۋننىڭ مالىمدەمەسىن جاريالادى. ول مالىمدەمەسىندە: «سولتۇستىك كورەيا سانكتسيا قىسىمدارىنا توتەپ بەرە الادى»، – دەگەن. بۇل ونىڭ ەكىنشى رەتكى «ترامپ-كيم سامميتىنان» كەيىنگى العاش رەت جاساعان مالىمدەمەسى.

بۇل قالايدا سولتۇستىك كورەيانىڭ كەلەسى قادامدارعا دايىندالىپ جاتقانىنان دەرەك بەرەدى. ونىڭ ءوزى الداعى ۋاقىتتا اقش-سولتۇستىك كورەيا اراسىنداعى قايشىلىق نەمەسە كەلىسسوزدەردىڭ قايتا جانداناتىنىن اڭعارتقانداي.

“The Qazaq Times”