اۋعانستان ۇكىمەتى تاليبانمەن كەلىسسوزگە دايىندالۋدا

اۋعانستان پرەزيدەنتى اشراف عاني ەلدەگى بەيبىتشىلىك پروتسەسىن باسقارۋ ءۇشىن ۇكىمەتتىك شەنەۋنىكتەردەن، وپپوزيتسيا وكىلدەرىنەن جانە ازاماتتىق وكىلدەردەن تۇراتىن جاڭا باسشىلىق كەڭەسىن جاساقتاپ شىقتى. بۇل كەڭەس كەلىسسوز وكىلدەرىن ىرىكتەپ، ۇكىمەتكە قارسى تاليبان قارۋلى توبىمەن كەلىسسوز جۇرگىزۋگە دايىندالۋدا.

بۇل جاڭا كەڭەستىڭ تولىق اتى – ىنتىماقتاستىق كوشباسشىلىق كەڭەسى. كەشە اشراف عاني وسى كەڭەستىڭ العاشقى وتىرىسىنا قاتىسىپ، بۇل قۇرىلعان كەڭەستىڭ اۋعانستانداعى قاندى قاساپتى توقتاتۋعا ىقپال ەتەتىنىنە سەنىمدى ەكەنىن ايتتى.

قۇراما شتاتتار تارابى اۋعانستانداعى 18 جىلدىق سوعىسىن اقىرلاستىرۋ ءۇشىن بىلتىر كۇزدەن باستاپ تالىپتەرمەن كەلىسسوز جۇرگىزە باستاعان ەدى. وسىنىڭ الدىندا ترامپ اۋعانستانعا جانە وڭتۇستىك ازياعا قاراتقان جاڭا ستراتەگياسىن جاريالاعان. اقش تارابى دا اۋعانستاندا بەيبىتشىلىك پروتسەسىن جۇزەگە اسىرۋ ءۇشىن تالىپتەرمەن كەلىسسوز جۇرگىزۋ كەرەكتىگىن قۋاتتاپ وتىر. الايدا، قۇراما شتات تالىپتەرمەن كەلىسسوزدە اقش پەن ناتو كۇشتەرىنەن كەيىن ەلدى تەررورلىق توپتاردىڭ مەكەنىنە اينالدىرماۋدىڭ كەپىلدىگىن سۇراپ وتىر.

اقش پەن تاليبان اراسىنداعى كەلىسسوزدى قۇراما شتاتتىڭ اۋعانستانداعى ارنايى وكىلى حاليزادتىڭ جۇرگىزىپ جاتقانى بەلگىلى. ناۋرىز ايىنىڭ باس شەنىندەگى كەلىسسوز كەزدەسۋىنەن كەيىن تاراپتار اۋعانستاننان شەتەل اسكەرلەرىن شىعارۋ تۋرالى العاشقى كەلىسىمدەرگە كەلە العانىن حابارلاعان ەدى.

جاڭادان قۇرىلعان ىنتىماقتاستىق كوشباسشىلىق كەڭەسىنىڭ وكىلى جاساعان مالىمدەمەدە، كەڭەستىڭ كوز الداعى مىندەتى ءبىر اپتا ىشىندە كەلىسسوز وكىلدەرىن ىرىكتەپ، دەلەگاتسيا قۇرامىن قۇرۋ. بۇل دەلەگاتسيا وسى ايدىڭ ىشىندە كاتاردا وتەتىن «اۋعانستان يسلام رەسپۋبليكاسى مەن تاليبان كۇشتەرى اراسىنداعى كەلىسسوزگە» قاتىسادى.  

 “The Qazaq Times”