سولتۇستىك كورەيانىڭ زىمىران سىناعى. فوتو: Public Radio International.

سولتۇستىك كورەيا ديالوگتار قارساڭىندا ءوزىنىڭ اسا ماڭىزدى سوحە سىناق پوليگوننىن جابۋعا ۋادە بەرگەن بولاتىن. الايدا، امەريكالىق اناليتيكالىق ورتالىقتار جاساندى جەر سەرىگىنەن تۇسىرىلگەن سۋرەتتەردى سالىستىرا وتىرىپ، اتالعان پوليگوندا قالپىنا كەلتىرۋ جۇمىستارى جۇرگىزىلىپ جاتقانىن حابارلاپ وتىر.

كورەي حالىقتىق دەموكراتيالىق رەسپۋبليكاسىنىڭ بيلىگى 2018 جىلى وڭتۇستىك-سولتۇستىك كورەيا باسشىلارىنىڭ كەزدەسۋىندە بالليستيكالىق زىمىران سىناقتارىن وتكىزەتىن پوليگونىن تولىق جابۋىعا جانە حالىقارالىق باقىلاۋشىلاردى كىرگىزۋگە ۋادە ەتكەن. بۇل ۋادەسى دە اياقسىز قالىپ قويدى.

سوحە پوليگوننىڭ ماڭىندا جاڭا عيماراتتاردىڭ پايدا بولىپ جاتقانىن امەريكالىقتار سپۋتنيكتەن تۇسىرىلگەن سۋرەتتەر ارقىلى ءبىلىپ وتىر. دەگەنمەن بۇل پوليگوندا سپۋتنيك ۇشىرۋ جانە زىمىران قوزعالتقىشتارىن سىناۋ ءۇشىن پايدالانعان.  ال، بالليستيكالىق زىمىران سىناعى بۇل جەردە وتكىزىلمەگەن.

اقش پرەزيدەنتى مەن كحدر باسشىسىنىڭ حانويداعى كەلىسسوزى ءساتتى بولمادى. سولتۇستىك كورەيانىڭ يادرولىق قارۋسىزدانۋىن تاقىرىپ ەتكەن سويلەسۋلەر مەرزىمىنەن بۇرىن جانە ناتيجەسىز اياقتالدى. سولتۇستىك كورەيا تارابى وزدەرىنە باعىتتالعان بارلىق سانكتسيالاردىڭ بىردەن الىنىپ تاستالۋىن تالاپ ەتىسىمەن-اق، امەريكالىق ليدەرلەر كەلىسسوز ۇستەلىنەن سىتىلىپ شىعا بەرسە كەرەك.

كەشە، ترامپتىڭ قاۋىپسىزدىك جونىندەگى كەڭەسشىسى جون بولتون سولتۇستىك كورەياعا جاڭا سانكتسيا سالىنۋى مۇمكىن ەكەنىن دە ايتىپ قالدى. بىراق، ول جاڭا سانكتسيانىڭ تەك قانا ديپلوماتيالىق ارنالار تولىقتاي توقىراۋعا ۇشىراعان كەزدە عانا ىسكە قوسىلاتىنىن ەسكەرتتى. دەمەك، اقش پەن سولتۇستىك كورەيا اراسىندا ءساتسىز دە بولسا تاعى بىرقاتار ديالوگ راۋندتارى ءجۇرۋى مۇمكىن.

“The Qazaq Times”