اقش پرەزيدەنتى دونالد ترامپ جەكسەنبى كۇنى اق ۇيدە گۋبەرناتورلاردى قابىلداۋ كەشىندە اقش-قىتاي اراسىنداعى ساۋدا كەلىسسوزى تابىستى اياقتالۋعا جاقىن قالعانىن مالىمدەدى.

ترامپ سوزىندە: «بۇل  تاريحتا بولماعان ءىرى كەلىسىم جانە ءبىز سول كەلىسىمگە قول جەتكىزۋگە تىم جاقىن تۇرمىز»، – دەگەن. ول جانە قىتاي دەلەگاتسياسى بەيجىڭگە قايتقاننان كەيىن، قىتاي ۇكىمەتى جاعىنان كۇردەلى وزگەرىستەر بولماسا وسى اپتا ىشىندە بۇل ماڭىزدى جاڭالىقتى جاريا ەتەتىنىن ايتقان.

اقش پرەزيدەنتى بۇعان ۇقساس مالىمدەمەنى ءوزىنىڭ الەۋمەتتىك جەلىدەگى پاراقشاسىنا دا جاريالاعان. «تۆيتتەر» پاراقشاسىندا قازىرگى ساۋدا كەلىسسوزدەرىنىڭ ەلەۋلى پروگرەسىنە بايلانىستى قىتاي تاۋارلارىنا تاريفتەردى جوعارلاتۋ شاراسىن كەيىنگە قالدىراتىنىن اتاپ كورسەتكەن.

ترامپتىڭ ءسوزىن قىتايدىڭ رەسمي اقپارات قۇرالدارى دا راستاپ حابار تاراتتى. ولار اقش-پەن ساۋدا كەلىسسوزىنىڭ 7-ءشى كەزەگىندە قوس تاراپ تەحنولوگيالار ترانسفەرتى، زياتكەرلىك مەنشىكتى قورعاۋ، تاريفتىك ەمەس كەدەرگىلەر، قىزمەتتەر، اۋىل شارۋاشىلىعى جانە ايىرباس باعامدارى بويىنشا ناقتى ماسەلەلەردە پىكىر بىرلىگىنە كەلە العاندارىن ايتقان. دەگەنمەن، اقش-قىتاي ساۋدا كەلىسسوزىنىڭ سوڭعى پروتسەسى قيىن بولعانىن، جىڭىشكەلىكپەن قاراپ تالداۋعا ءتيىستى جاڭا پروبلەمالاردىڭ دا پايدا بولعانىن ايتادى.

“The Qazaq Times”