اقش ۇلتتىق بارلاۋ قىزمەتىنىڭ ەكس-ديرەكتورى دجەيمس كلەپپەر رەسەيلىكتەردىڭ 1960 جىلدان باستاپ ءارتۇرلى ەلدەردىڭ سايلاۋ جۇيەسىنە ارالاسقاندىعىن مالىمدەدى.

كولۋمبيا ۋنيۆەرسيتەتىندە ءوزىنىڭ «فاكت جانە قورقىنىش: بارلاۋ ءومىرىنىڭ قيىن شىندىقتارى» اتتى كىتابىنىڭ تۇساۋكەسەر ءراسىمى بارىسىندا، كرەمل 2016 جىلى اقش-تىڭ سايلاۋىنا ارالاسۋ جۇيەسىن ەڭ العاش ۋكرايناداعى سايلاۋ كەزىندە تاجىريبيەدەن وتكىزگەندىگىن ايتتى.

«ەگەر بىلاي ايتار بولساق، ۋكراينا زەرتحانا بولا ءبىلدى. «رف پرەزيدەنتى ۆلاديمير پۋتين ۋكراينادا ءوزىنىڭ ءارتۇرلى قارۋلارىن تەكسەرىپ، ونىڭ قانداي اسەر بەرەتىندىگىن سىناقتان وتكىزدى. مۇندا «جاسىل ادام»، ءتۇرلى ارانداتۋشىلىقتار ياعني، ەلەكتر جەلىلەرىنىڭ شابۋىلى تۋرالى ايتىپ وتىرمىز. اقش سايلاۋىندا قولدانىلعان بارلىق تاكتيكا ەڭ العاش ۋكراينادا سىناقتان وتكىزىلدى»، -دەپ مالىمدەدى كلەپپەر.

2016 جىلى اقش بيلىگى پارتيانىڭ سەرۆەرى بۇزىلعاندىعىن مالىمدەپ، رەسەيدى كىنالاعان بولاتىن. سونىمەن قاتار، امەريكاداعى سايلاۋعا ارالاسقاندىعىن دا اتاپ وتكەن. ال، سول جىلدىڭ جەلتوقسان ايىندا تسرۋ ارنايى تەكسەرۋ جۇرگىزىپ، ناتيجەسىندە رەسەيدىڭ ارالاسۋىمەن دونالد ترامپتىڭ جەڭىسكە جەتكەندىگى تۋرالى مالىمدەدى. بۇدان بولەك، ارنايى قۇجاتتى ۆلاديمير پۋتين اقش سايلاۋىنا ارالاسۋ ءۇشىن كومپانيالارعا تىكەلەي تاپسىرما بەرگەندىگى دە جازىلعان.

وسىدان كەيىن، اقش-تىڭ ارنايى پروكۋرورى روبەرت ميۋللەر 2017 جىلدىڭ مامىر ايىنان باستاپ، رەسەي بيلىگىنىڭ امەريكا سايلاۋىنا ارالاسۋى جانە كرەمل اقش پرەزيدەنتى اراسىندا بولۋى مۇمكىن كەلىسىم تۋرالى تەكسەرىس جۇرگىزۋدە.

ەستەرىڭىزگە سالا كەتەيىك، 2018 جىلدىڭ قازانىندا ۋكراينا پرەزيدەنتى پەتر پوروشەنكو رەسەي ۋكرايناداعى سايلاۋعا بەلسەندى تۇردە ارالاسۋعا دايىندالۋدا دەپ مالىمدەگەن بولاتىن. وسىدان كەيىن، ەۋروپا مەملەكەتتەرى الدا بولاتىن پرەزيدەنتتىك سايلاۋ كەزىندە كيبەر شابۋىلدىڭ الدىن الۋعا كومەكتەسەتىندىكتەرىن جەتكىزگەن.

 "The Qazaq Times"