«يسلام مەملەكەتى» ۇيىمنىڭ سوڭعى تۇراعىنا شابۋىل: ءسۇريادا سوعىس اياقتالدى ما؟

ءبىر كۇن بۇرىن ءسۇريانىڭ وپپوزيتسيالىق كۇشتەرىنە قاراستى ارميا اقش-تىڭ قولداۋىندا «يسلام مەملەكەتى» تەررورلىق ۇيىمنىڭ سوڭعى تۇراعىنا شابۋىل جاسادى. «يسلام مەملەكەتى» تەررورلىق توبىنىڭ سوڭعى كۇشتەرى ءسۇريانىڭ وڭتۇستىك شىعىسىنداعى يراك شەكاراسى ماڭىنا جاسىرىنعان.

«ءسۇريا دەموكراتيالىق كۇشتەرىنىڭ» مالىمەتىنە قاراعاندا «يسلام مەملەكەتى» تەررورلىق توبىنىڭ سوعىسقا ەڭ تاجريبەلى جيھادشىلارى كۇشتى قارسىلىق كورسەتكەن. سونداي-اق، قارۋلى وپەراتسيا باستالۋدان بۇرىن ايماقتان 20 مىڭعا جۋىق بەيبىت تۇرعىندار ەۆاكۋاتسيالانعان.

ەستەرىڭىزدە بولسا، 2014 جىلى يراكتىڭ موسۋل قالاسىندا وزدەرىن «يسلام مەملەكەتى» اتاعان تەررورلىق توپ حاليفات قۇرعانىن جاريالاعان. 2016-2017 جىلدارى اتالعان قارۋلى توپ يراك پەن ءسۇريانىڭ كوپتەگەن جەرىن باسىپ العان بولاتىن. ولار ءوز باقىلاۋىنا العان ايماقتا 7 ملن 700 مىڭنان استام تۇرعىن بار بولاتىن.

قۇراما شتاتتار باستاعان حالىقارالىق كواليتسيا جانە وزگە دە بىرقاتار ەلدەردىڭ اسكەري كۇشتەرىنىڭ دايش-كە قارسى كۇرەسىنەن كەيىن «يسلام مەملەكەتى» تەررورلىق توبى ءسۇريانىڭ يراكپەن شەكارالاس دەير-ءاز-زور ايماعىنداعى شاعىن عانا اۋماقتى يەلەپ قالدى. سوڭعى بىرنەشە ايدان بەرى «ءسۇريا دەموكراتيالىق كۇشتەرى» اقش-تىڭ اۋە كۇشتەرىنىڭ قولداۋىندا وڭتۇستىك شىعىس ايماقتارداعى «يم» كۇشتەرىنىڭ تەرريتوريالارىن بىرتىندەپ قايتارىپ الدى.

«يم» كۇشتەرى باقىلاۋىنا العان قالالاردى بوساتۋدا «ءسۇريانىڭ دەموكراتيالىق كۇشتەرى» كوپ قيىنشىلىقتارعا تاپ بولعانى بەلگىلى. قالا مەن اۋىلداردى ۇلكەن كۇش جۇمساۋ ارقىلى بوساتتى. قازىرگى كەزدە تەررورلىق توپ وتە از عانا اۋماقتى يەلەپ تۇر. بىراق، اقش پرەزيدەنتى وسى اپتادا سۇرياداعى «يم» كۇشتەرىن تولىعىمەن جوياتىنىن مالىمدەگەن بولاتىن. ارينە، اقش پرەزيدەنتىنىڭ بۇل مالىمدەمەسى ءسۇريادان اقش اسكەرلەرىنىڭ كەتۋىنە لايىقتى سەبەپ بولىپ تا قالماق.

بۇدان ءبىر جىلدان استام ۋاقىت بۇرىن يراك ارمياسى موسۋلدى ازات ەتىپ، «يسلام مەملەكەتى» كۇشتەرىنە قارسى سوعىستى جەڭىسپەن اياقتاعانىن مالىمدەگەن. ەندى ءسۇريا جەرىنەن دە تەررورلىق ۇيىمنىڭ تەرريتورياسى تازارتىلماق. الايدا، كوپتەگەن ساراپشىلار بۇل ەكى ەلدەگى تەرروريزمگە قارسى كۇرەستىڭ اياقتالعانىنان دەرەك بەرمەيدى دەپ قارايدى. سەبەبى، اتالعان تەررورلىق ۇيىمنىڭ مۇشەلەرى جاسىرىن اركەت ەتۋدە. يراك پەن ءسۇريا جەرىندە ءالى دە بەيبىت تۇرعىن اراسىنا جاسىرىنعان جيھادشى كۇشتەر بار.

سونداي-اق، بۇۇ مالىمەتىنە قاراعاندا، يراك پەن ءسۇريا جەرىندە «يم» تەررورلىق توبىنىڭ 14-18 مىڭ شاماسىنداعى جيھادشى كۇشتەرى بار. ولاردىڭ 3 مىڭنان استامى شەتەلدەردەن كەلگەن. ونىڭ سىرتىندا اۋعانستان، ليۆيا، مىسىر، وڭتۇستىك شىعىس ازيا جانە باتىس افريكا ەلدەرىندە «يسلام مەملەكەتى» تەررورلىق توبىنىڭ جاقتاستارى ارەكەت ەتۋدە.

“The Qazaq Times”