اۋعانستانداعى تەررورلىق توپتار مەن ۇكىمەت كۇشتەرى اراسىنداعى قاقتىعىس كۇشەيدى. فوتو: NURPHOTO/BBC

ۇجىمدىق قاۋىپسىزدىك تۋرالى شارت ۇيىمى ورتالىق ازياعا قاۋىپ ءتونىپ تۇرعانىن راستادى. اتالعان ۇيىمنىڭ مالىمەتىنە قاراعاندا، 2018 جىلدىڭ قورىتىندىسى بويىنشا ءارتۇرلى تەررورلىق ۇيىمداردىڭ جانە اۋعانستانداعى ۇكىمەت كۇشتەرىنىڭ اراسىنداعى قاقتىعىستار 40 پايىزعا وسكەن. بۇل ەڭ الدىمەن ورتالىق ازيانىڭ قاۋىپسىزدىگىنە قاتەر توندىرمەك.

ۇجىمدىق قاۋىپسىزدىك شارت ۇيىمىنىڭ ۇيىمداستىرۋ شتابىنىڭ جەتەكشىسى اناتولي سيدوروۆ كەشە وتكىزگەن ءباسپاسوز ماجىلىسىندە ورتالىق ازيا، شىعىس ەۋروپا جانە كاۆكاز ءوڭىرىنىڭ ماسەلەلەرىنە كوبىرەك توقتالعان. «ورتا ازياداعى ۇيىمعا مۇشە ەلدەرگە باسى قاۋىپ اۋعانستانداعى كۇشەيە تۇسكەن قاۋرلى قاقتىعىستار. ەلدەگى تالىپتەر مەن وزدەرىن «يسلام مەملەكەتى» اتاعان تەررورلىق ۇيىمنىڭ بەلسەندىلىگى ارتىپ كەلەدى. بۇل جاعداي وڭىردەگى «وزبەكستان يسلام قوزعالىسى» جانە «شىعىس تۇركىستان يسلام قوزعالىسى» ۇيىمدارى ءۇشىن قولايلى جاعداي جاراتىپ وتىر»، – دەيدى سيدوروۆ.

بىراق، ۇيىمدىق قاۋىپسىزدىك شارت ۇيىمى اقش-تىڭ اۋعانستانداعى ستراتەگياسىن سىنعا العان. بۇل ۇيىم اقش-تى اۋعانستانداعى داعدارىستى شەشۋ ءۇشىن ەمەس، كەرىسىنشە ءوزىنىڭ مۇددەسىن قورعاۋدى باستى ورىنعا قويىپ وتىر دەپ قارايدى.

رەسەي مەن اقش اۋعانستان داعدارىسىن شەشۋ ءۇشىن ارەكەتتەردى ۇيلەستىرۋگە كۇش سالىپ جاتقانى بايقالمايدى. اۋعانستان ۇكىمەتىنە اقش-تىڭ ىقپالى رەسەيدەن باسىم ەكەنى بەلگىلى. قازىر تالىپتەرمەن كەلىسىمدەر جۇرگىزۋدە. رەسەي دە قاراپ جاتپاي، تالىپتەردى جانە اۋعاندىق ءتۇرلى ساياسي كۇشتەردى ديالوگقا شاقىرۋدا. ۋاشينگتون مەن ماسكەۋ بۇل جاعىندا مۇلدە بىرلىككە كەلمەسى انىق. بۇعان قاراپ، ورتالىق ازيا ەلدەرى ءۇشىن اۋعانستاننان تونەتىن قاۋىپتىڭ الدىن الۋ ماسەلەسىن ءوزارا تالقىلاۋى، ورتاق ماسەلە رەتىندە شەشۋگە تىرىسقانى ابزال.

“The Qazaq Times”