وڭتۇستىك كورەياداعى اقش اۋە كۇشتەرى. فوتو: VOA.

وڭتۇستىك كورەيا مەن امەريكا قۇراما شتاتتارى كورەياداعى اقش قارۋلى كۇشتەرىنىڭ قورعانىس شىعىنىن ءبولىسۋ تۋرالى ارنايى كەلىسسوز وتكەن جىلى 31 جەلتوقساندا اياقتالعان ەدى. بۇل كەلىسسوز ناتيجە بەرمەگەندىكتەن، تاراپتار اتالعان ماسەلە بويىنشا قايتالاي سويلەسۋدە. دەگەنمەن، قورعانىس شىعىندارىن ورتاقتاسۋ ماسەلەسى بويىنشا اقش پەن كورەيا اراسىندا پىكىر قايشىلىعى بولعانىمەن، ەكى ەل اسكەري وداق رەتىندە ءالى دە بەكەم قارىم-قاتىناستا ەكەنىن راستاپ وتىر.

وڭتۇستىك كورەيادا اقش-تىڭ 20-دان استام اسكەري بازاسى بار جانە 28 مىڭ 500 جاۋىنگەرى تۇرادى. بىلتىر وڭتۇستىك كورەيا ءوز جەرىندەگى اقش اسكەرلەرىنىڭ ەسەبىنە 850 ملن اقش دوللارىن بولگەن ەدى. قۇراما شتات بولسا بيىلعى جىلى وڭتۇستىك كورەيا بۇل قارجىنى ەكى ەسەلەسە دەپ ۇمىتتەنەدى.

قۇراما شتات باستابىندا وڭتۇستىك كورەيادان 1,6 ملرد اقش دوللار قارجى ءبولۋدى سۇراعان ەدى، كەلىسسوز ناتيجە بەرمەگەننەن كەيىن بۇل ساندى 1,2 ملرد-قا دەيىن قىسقارتتى. اقش 850 ملن اقش دوللارى جالپى قورعانىس شىعىنى جانىندا وتە از ەكەنىن العا تارتسا، وڭتۇستىك كورەيا امەريكالىقتار جەردى پايدالانعانى ءۇشىن اقى تولەپ وتىرعان جوق دەپ ناليدى.

وسى ماسەلە بويىنشا ۋاشينگتون مەن سەۋل 3 جىلدان ءبىر 10 مارتە كەلىسسوز جۇرگىزسە دە، بارلىعى دەرلىك ناتيجە بەرمەدى. كەيبىر تۇلعالار اقش پرەزيدەنتى وسىعان بايلانىستى جانە سولتۇستىك كورەيا باسشىسى كيم جوڭ ۋنمەن كەزدەسۋگە وراي وڭتۇستىك كورەياداعى امەريكالىق اسكەرلەردىڭ سانىن ازايتۋى مۇمكىن دەپ الاڭدايدى. بۇل الاڭداۋشىلىق كوبىنە-كوپ وڭتۇستىك كورەيالىقتارعا تيەسىلى.

بيىل ءساۋىر ايىنا دەيىن سەۋل مەن ۋاشينگتون اتالعان تاقىرىپ بويىنشا كەلىسىمگە قول جەتكىزۋى ءتيىس. ولاي بولماعاندا امەريكالىق اسكەري قىزمەتكەرلەرمەن جۇمىس ىستەيتىن شامامەن 8700 كورەيالىق جۇمىسسىز قالۋى مۇمكىن.

“The Qazaq Times”