يران ءسىم باسشىسى پومپەونىڭ مالىمدەمەسىنە جاۋاپ بەردى

يران سىرتقى ىستەر ءمينيسترى اقش مەملەكەتتىك حاتشىسىنىڭ يران تۋرالى پىكىرىنە قارسى مالىمدەمە جاسادى. يران ءسىم باسشىسى مۇحاممەد جەۆاد زاريف پومپەوعا قارسى مالىمدەمەسىن «تۆيتتەر» الەۋمەتتىك جەلىسى ارقىلى جاساعان.

زاريف «تۆيتتەر» پاراقشاسىنا: «اقش قاي ەلگە كيلىكسە سول ەلدە بىلىقپالىق پەن قايشىلىقتار پايدا بولىپ كەلەدى. بىراق، يران اقش ويلاعانداي كۇيگە تۇسپەيدى»، – دەپ جازعان.

يران ءسىم باسشىسىنىڭ بۇل مالىمدەمەسى اقش مەملەكەتتىك حاتشىسىنىڭ ورتا شىعىس ساپارىندا جاساعان مالىمدەمەسىنە باعىتتالعان. پومپەو يوردانياداعى ساپارىندا: «يرانعا تەك ديپلوماتيالىق قىسىم عانا ەمەس، سىرتقى ساۋداسىنا دا شەكتەۋ قوياتىن بولامىز»، – دەپ مالىمدەگەن.

پومپەو اپتانىڭ باس شەنىندەگى ورتا شىعىستاعى بىرنەشە ەلگە رەسمي ساپار جاسادى. مىسىر، يراك، يوردانيا قاتارلى ەلدەردە جوعارى بيلىك وكىلدەرىمەن كەزدەسۋ وتكىزدى. ساراپشىلار پومپەونىڭ كەزەكتى ساپارى اقش-تىڭ ورتاعى شىعىستاعى بەلسەندىلىگىن بۇرىنعىدان دا ارتتىرا تۇسەدى دەپ باعالاۋدا.

“The Qazaq Times”